فيس بوك" لمعارضى حكم مذبحة بورسعيد: أنت منافق ولا حرج عليك"

أثارت الاشتباكات الدامية بين المحتجين قوات الأمن ببورسعيد اليوم السبت حفيظة مستخدمي موقع التواصل الاجتماع "فيس بوك" ،حيث أدانوا الاشتباكات و نددوا بالانقسام الحادث بين المصريين و أشادوا بقرار المحكمة الذي أحال أوراق 21من المتهمين في مذبحة بورسعيد إلى المفتي لإبداء الرأي.
ويقول أحمد أسامة أحد مستخدمي الفيس بوك " أتصور أن هناك ثوار محترمين يحاولون الآن تفريغ الحكم من قيمته بأنه مسيس أو عدالة ناقصة ، و ده للأسف متاجرة سياسية من نوع آخر ، الحكم تاريخي و برد نار أهالي الضحايا ، و ننتظر أن تدين الأدلة الجديدة المحرضين على الجريمة"."
بورسعيد الباسلة
فيما انتقدت وفاء هلال على صفحتها وصف شباب الالتراس بمثيري الشغب قائلة " من دقايق شباب الألتراس عدوا من تحت عمارتنا فرحانين بالأحكام بيطبلوا وبيغنوا ،لحظتها سمعت تعليق قال عليهم "دول شوية عيال صايعة"، العيال الصايعة دي هما الكتلة البشرية الأكبر في بدايات ثورة يناير وهما اللي تصدوا للأمن المركزي وبصراحة جدعان وناس جريئة ولو مكانوش كدة مكانتش الداخلية القديمة انتقمت منهم في أحداث بورسعيد أيا كانت توجهاتهم أيا كان دينهم يكفي صرختهم بكلمة الحق في الوقت الصحيح اعدلوا يرحمكم الله.
في حين رأى الإعلامي نور الدين عبد الحافظ أن "إعدام ريا وسكينة لم يكن إساءة إلى الإسكندرية الجميلة وإعدام خط الصعيد لم يكن مهينا إلى رجال الصعيد الشرفاء وحكم اليوم لا يقلل من قدر بورسعيد الباسلة كل البلاد فيها شرفاء وغيرهم ، ستظل بورسعيد شامخة في قلب كل مصري".
خطوة ايجابية
وفي ذات السياق أبدت أسماء جاب الله قائلة " سعييييييييده جدااا بقرار المحكمة اليوم أي نعم هو حكم مؤقت بس هي خطوه إيجااابيه جدا والحمدلله وبعدين نص العمى ولا العمى كله ومدام جيبا حق شهداء مذبحه بورسعيد تمام زى الفل طبعاً نجيب بقا حق شهداء 25 يناير ولا هما دول احسن من دول مثلاً ؟؟؟ ولا عشان المتهم فيها مبارك والعدلي واحمد عز ودول طبعاً نااااس مهمييين وناس تقيله ؟؟ دا بقا اللازم نلتفت ليييه الفترة الجااايه وناااخد بالنا من اللىهيحصل معاااهم مش التهريج اللي بيحصل اليومين دول الشعب يريد إسقااااط النظاام نظام إيه د إنتم عاايزين تسقطوا".
السبوبة مستمرة
وعلى صعيد أخر انتقد حسام عبد العزيز المعارضين للحكم " ليس عيبا أن تكون بالأمس مع الألتراس واليوم ضدهم فأنت منافق ولا حرج عليك. العيب أن يكون أنصارك معك حيثما وليت وجهت. هذا هو التعريف الرسمي للخرفان".
وعلى نفس الصعيد يقول صاحب حساب يحمل اسم "هيموتيكس إبراهيم" " تنبيه للأصدقاء الثورجية اللي لسه مخدوش بالهم: السبوبة النهارده مع "أم الشهيد" بتاع بورسعيد, سيبك من "صاحب الشهيد" بتاعت أمبارح عشان المصلحة مش هتمشي معاه النهارده، وللأصدقاء المحايدين والمحتارين واللي مش عارفين يقفوا مع مين، لسه مش قادرين تميزوا تجار الثورة؟!، إمبارح: إحنا معاكم يا ألتراس ولعوا واحرقوا وعطلوا, الناس دي شافت أصحابها بتموت. لو جربت تبقى أم شهيد هتحس باللي بيعملوه، النهارده نفس الناس بالظبط: إحنا مع البورسعييديين ضد الحكم المسيس, الناس ماتت والشرطة بلطجية, جربت تبقى أم شهيد؟،المهم إن السبوبة, قصدي الثورة مستمرة".
ومن الجدير بالذكر أن محكمة جنايات بورسعيد التي عقدت بأكاديمية الشرطة قضت بإحالة أوراق 21 متهما في مذبحة بورسعيد مما أشعل الاشتباكات في محيط سجن بورسعيد بين المحتجين وقوات الأمن وقع على إثرها 36 قتيل من الطرفين و 250 مصاب ، فيما رفض العديد من السياسيين حكم الحكمة واصفين إياه "بالمسيس ." .