غضب بالبحيرة تعليقا على أحكام الإعدام.. وآخرون: "خلينا نخلص"

أشعل الحكم بالإعدام على الرئيس محمد مرسي، وتنفيذ الإعدام على 6 شباب في قضية "عرب شركس"، غضب أهالي البحيرة، سواء مؤيدين ومعارضين للحكم العسكري، فيما رآها أخرون أنها ردعا لجماعة الإخوان المسلمين.
وقالت ماري فليب، طبيبة، "أنا ضد الإخوان، بس ضد أحكام الإعدام كمان عشان شايفه أنها مش سليمة"، فيما قال ربيع منعم، سواق، "والله مش عارفين الحق فين؟ بس ازاي محمد مرسي بقى رئيس وبعدين يحاكموه على حاجة سياسية من أيام مبارك؟ يعني لو حاكموه يبقى المفروض يحاكموا اللي سمح له بدخول انتخابات الرئاسة ".
وقالت الحاجة فهيمة خليل، بائعة خضار،"والله ده ظلم، ازاي يحكموا على الناس النضيفة دي بالإعدام؟ احنا عندنا هنا الإخوان اللي كانوا بيشوفوا مصلحتنا ويعملوها يحكموا ليه عليهم كده؟ حسبي الله ونعم الوكيل في السيسي واللي بيأيده"، أما عن قضية عرب شركس فقالت "انا معرفش حد من الشباب دول بس ربنا يرحمهم ".
وقال محمد عبدالرحمن، تاجر ملابس، "والله لما شوفت خبر إعدام عرب شركس بكيت، والحكومة هتعدم ناس تانيين لحد ماييجي يوم ويعدموا الريس، المفروض نواجههم لحد مايسيبوا الحكم واللي يتورط في قتل يتقتل، ومش هقول حاجة للشهداء، غير ربنا يتقبلكم في الشهداء وانتم ربنا حرركم من الأسر للحرية، والنعيم في الجنة".
وعلى النقيض، قال ميدو إبراهيم، صاحب سايبر، "كان نفسنا نسمع الأحكام ده من زمان، خلينا نخلص بقى من الإخوان، وده يبقى قصاص لشهداء الجيش من اللي بيحصل فيهم في سينا ".
ورفض البعض الحديث، قائلا: "ياعم فكنا من السياسة مش ناقصين هم، خلينا في لقمة عيشنا، ربنا يسترها معانا".