آخر كلام

 سؤال برىء جدًا جدًا: هو فين موقف مجلس "النوام".. آسف قصدى مجلس النواب بغرفتيه.. مما تواجهه مصر الآن من تحديات إقليمية ودولية..؟!
لماذا لا يعلن بوضوح، باعتباره ممثلا للشعب المصرى من أسوان لراس التين، عن دعمه لقضايانا المصيرية؛ ووقوفه خلف قيادتنا الحكيمة وخلف جيشنا العظيم، فى هذه الظروف العصيبة، ضد ما يحاك لنا من مؤامرات ومخططات مجنونة تستهدف وتهدد أمننا القومى وسيادتنا على أرضنا..؟!
لماذا لا يتحرك لشرح رؤية مصر فى المحافل الدولية وبرلمانات العالم.. والتأكيد على مواقفنا الثابتة تجاه قضايانا المصيرية وقضايا أمتنا العربية..؟!
سامحونى إذا كنت قد أزعجت المجلس الموقر بأسئلتى الساذجة.. وأقلقت منامهم وراحتهم خاصة فى هذا الشهر الفضيل.. كل عام وأنتم بخير.. ويجعله عامر..!
 أهلى إيه وزمالك إيه وكرة قدم إيه اللى عايزين تفتتوا الجبهة الداخلية بسببها..؟!
يا جماعة اختشوا.. الظرف صعب..والتحديات خطيرة.. والكل يتربص بنا وبأمننا القومى.. والعدو على حدودنا.. وإنتم بتتكلموا عن الأهلى والزمالك والتلات نقاط من حق مين..؟!
أمال لو بتلعبوا كورة قدم حقيقية كنتم هاتعملوا فينا إيه..؟!
ياريت الحكومة تتدخل لفض هذا المولد العبيط.. لامؤاخذة.. لأن البلد مش ناقصة تفتيت وتشتيت..!
على فكرة شتيمة العبد لله حرام فى رمضان..!
 نصيحة لوجه الله للشيخ إياه بتاع يا "زينبو": سايق عليك النبى ارجع لأصلك وسيبك من الكلام الفاضى اللى لا بيودى ولا بيجيب اللى بتعمله دلوقت..؟!
إنت مالك ومال الفن والفنانين.. دا توب مش توبك أبدًا.
الناس كانت مستحملاك بالعافية وأنت بتستخف دمك وبتقول يا زينبو.. ويا بت أنت حد مسلطك عليا.. وإضربيه يا بت.. وحرام وحرامين وتلات حرامات.. إلى آخر تلك اللطافة والظرافة وخفة الدم اللى تلطش.. قصدى اللى تدهش..!
لكن أن تصل الحكاية لشاكوش اللى بتسأله: "إنت شفت كعب البنت المحنى فين"..؟! ولبنت ملك الترسو اللى بتسألها: إنت جبتى الحلاوة دى منين.. فدا كتير..كتير قوى.. أوفر..!
حضرتك بكدا عملت زى الغراب اللى عايز يبقى طاووس.. فلا بقى طاووس ولا رجع غراب زى ما كان.. بقى حاجة جدًا صايصة ومايصة.. لامؤاخذة..!
ولا حول ولا قوة إلا بالله.
 هو إحنا مش هانخلص بقى من المسلسل الهابط والحدوتة البايخة بتاعة زواج وطلاق الأختين الحلوين هناء وشيرين..؟!
يا جماعة ارحمونا بقى.. المرارة اتفقعت والأستبن بالشىء الفلانى.. وكل اللى فى السوق تايوانى مضروب..؟!
الرحمة حلوة..!!