آخر كلام

× آخر افتكاسة للدكتور "إياه" اللى غاوى أضواء وشهرة، وبيفتي على روحه، إن المسلم يمكنه أن يضحى بفرخة أو أى طائر بدلا من عجل أو خروف..!!
وفتح بسلامته صدره قائلا إنه يتحدى أى شيخ يعارض هذه الفتوى..!!
ونسى بسلامته أو تناسى أن الأضحية يجب أن تكون من بهيمة الأنعام وهى البقر والإبل والأغنام من ضأن وماعز؛ كما نص القرآن الكريم.. كما أن دار الإفتاء أكدت أنه لايجوز أبدًا التضحية بالدجاج..
أموت وأعرف هو بسلامته جاب فتوى التضحية بالفراخ دى منين..؟!
هى حاجة من اتنين إما إن حضرته صهلل من وهج الكاميرات والأضواء؛ فوسعت منه خالص أو إن حضرته داخل شريك فى نص محل فرارجى..!!
× أكبر عقاب لجزار الطالبية؛ اللى كان بيبيع لحم الأحصنة على إنه لحم بقرى، إنه ياكل من نفس اللحم تلات وجبات قى اليوم.. وأنا متأكد إنه هايخرج من السجن، بعد قضاء العقوبة، بديل وأربع رجلين.. وصحته زى "الحصان"..!!
× بالمناسبة.. أخشى إن الدكتور إياه، اللى بيفتى على روحه، يزيط فى الزيطة، ويفتكس فتوى يؤكد فيها إنه يجوز التضحية بالخيل والبغال والحمير لأنها حلال.. حلال..حلال.. المهم تسلخ قبل ما تدبح.. زى المعلم بوحة الصباحى..!!
× يبدو إننا مش هانخلص من حدوتة القرش بتاع الغردقة..!!
فبعد المحللين الاستراتيجيين اللى صدّعوا دماغنا بنصايحهم المفتكسة حول كيفية مواجهة أى قرش يقابلنا وإحنا ماشيين فى أمان الله على الطريق الدائرى أو المحور.. بدأت الستات بتوع برامج الطبخ يزيطوا فى الزيطة ويعملوا لنا حلقات كاملة عن كيفية طبخ لحم سمك القرش..!!
اللى تقول لك ممكن يتعمل طواجن فى الفرن بالصوص الأبيض أو الأحمر مع شرايح البطاطس.. واللي تقول لك: دا طعمه جنان لما يتعمل سنجارى أو زيت وليمون.. وياحلاوته وطعامته لو اتعمل مقلى جزل..!!
يخرب بيت كدا.. شعب مالوش كتالوج فعلا..!
× يبدو إن أغانى التفاهة والبلاهة مش عايزة تجيبها البر أبدًا..!!
فبعد أغانى المهرجانات اللى بتحرض على الإرهاب.. والضرب والقتل.. والتحرش.. رجعت أغانى البانجو ببجاحة تحسد عليها دون أن يتدخل أى أحد لمنعها وحماية البلاد والعباد من هذا التلوث السمع والبصرى والعقلى.
يقطع البانجو وسنين البانجو.. قال "سطلانة" قال..؟!!