ثورة الحرية

شعر - مصطفى عبد المنعم:
فى عصر الأخطبوط
الحرية بتموت..
والحق اللى كان صوته أعلى صوت
لبسوه لجام سكوت
يوم ما صرخ
قال أه..
فى وش الطغاه
حبسوه فى زنزانه
تلاتين سنة عاشها مهانه
من يومها وشمس الحرية
تاهت وسط الضباب
وبقت سراب..
ليل الظلم طوّل ع البلاد
ضاع الامان جوانا
والعمر عمال يفوت
والحلم الجميل بيموت
فى عصر الأخطبوط
هلت علينا ثورتك.. يا يناير
ياثورة هلت بالبشاير
يومها خرج الشعب غضبان وثاير
ووقفنا فى ضهرك ياشبابنا
حالفين نجيب حق بلدنا
صرخ الشباب قال: لا
لا... للديابة اللى كلو قوت الغلابة
خلوها غابة....
ودموعنا تبكى ع الربابة
سرقونا يابا
سرقونا يابا
لا للفساد
لا... لا لظلم العباد
لا... للعناد
لا.... للى بيهدو البلاد
خدنا الحماس...
وبقينا أقوى من الرصاص اللى انضرب فينا
لا همنا الخوف.. ولا المولوتوف
والغاز بيعمى عينينا
ما اتهزينا...
واتقدمت خطاوينا لما نادينا
«الشعب يريد إسقاط النظام»
«الشعب يريد إسقاط النظام»
تلاتين سنة... ده كفاية حرام
بقى نفسنا فى لحظة حرية
تقوى بوحدتنا الوطنية
بقى نفسنا فى ديمقراطية
فيها انتخابات.. حرة ونزيهة ونقية
ونقولها بأعلى صوت
راح السكوت...