كل سنة وأنت موجود..!

«كل سنة وأنت طيب» كلنا بنقولها لبعض فى كل عيد وكل رمضان وكل سنة جديدة ، ودايما لما كنت بسمعها بحس إنها ملهاش لازمة يعنى هو إيه اللى هيحصل؟ عادى كل سنة هبقى موجودة، وكل سنة هييجى العيد ورمضان، ومكنتش حاسة بالدنيا وإيه اللى ممكن تخبيه...بس خلاص جه اليوم اللى عرفت فيه قيمة الكلمة دى، وليه الناس بتقولها، ولما حد يقولى كل سنة وأنتى طيبة دلوقتى معناها عندى بقى كبير.. اللى حصل هو الموت اللى مكنتش عاملة حسابه، فعلا..الموت هو الحقيقة الوحيدة اللى فى حياتنا بس حقيقة مرة جدا، صعب جدا إن يكون فى إنسان عزيز عليك جدا ويبقى على طول معاك، ويوم ما تحب تشوفه فجأة متلقهوش، مش موجود فى عالم الأحياء كلهم مهما حاولت تدور، صعب ييجى العيد ومتلقيش اللى تقوله كل سنة وأنت طيب... ليه الدنيا أساسها الفراق؟ ليه اللى بنحبهم بيروحوا من بين إيدينا
كان فى ناس معانا فى رمضان اللى فات، وجه رمضان ده وهم مش موجودين، وكان فى ناس معانا فى رمضان ده وجه العيد وهم مش موجودين، يا ترى رمضان اللى جاى مين هيكون موجود ؟ مين أنا قولتله كل سنة وأنت طيب ومش هلاقيه ؟ ويا ترى أصلا أنا هكون موجودة لرمضان اللى جاى ولا لأ ؟ ويا ترى هييجى العيد وهيلاقينى ولا لأ ؟ بس يارب لما نكون موجودين نكون موجودين بجد، ولما نكون مش موجودين يكون لينا ذكرى طيبة، دلوقتى بس عرفت معنى كلمة كل سنة وأنت طيب.. كل سنة وأنتم كلكم طيبين وموجودين فى حياة كل اللى بتحبوهم و بيحبوكم. . مى فهيم