هذا هو المعني الحقيقي لل "سيكو سيكو"

ماذا تعني كلمة سيكو سيكو داخل الثقافة المصرية؟
غريبة.. من ساعة فيلم النمر والأنثي وكلمة عادل إمام في الفيلم لما كان مش فاكر الإشارة فالواد بيقول سيكو سيكو
ساعتها ارتبطت الكلمة بثقافة المصريين.. وأي حاجة بين اثنين مش عايزين تالت يفهمهم بيقولوا عليها سيكو سيكو.
ممكن تسمع كلمة سيكو سيكو بين اتنين بيتكلموا عن حشيش أو بانجو أو عن عملية سرقة كبيرة أو تهريب مخدرات أو آثار.
طبعا الكلام ده ما بيحصلشي إلا في الأفلام العربي.. علي فكرة أنا أمي لما تحب تبعتني اجيب لحمة من المجمدة أم خمستاشر جنيه.. تقولي هات لحمة م السيكو سيكو. ولما احب استعبط علي أخويا الصغير واجيب حاجة حلوة ومش عايز أقوله عليها.. أقول إني رايح أجيب سيكو سيكو وبرده لما أحب اجيب حاجة للبيت ومش عايزة يفتن للجيران "أصله فتان والجيران عنيها وحشه" أقوله إني رايح أجيب سيكو سيكو.
لكن اليومين دول كلمة سيكو سيكو بقي ليها معاني كتير.. دي أصبحت كلمة عالمية معتمدة عن الدول الأوروبية لدرجة أن بريطانيا هتعمل كريم وتسميه سيكو سيكو.
لو أنت نزلت محطة رمسيس بالمترو.. وخرجت من ناحية شارع السبتية هتلاقي واحد قاعد بصينية عليها شوية بخور وحاجات تانية ومن ضمنها علب صغيرة.. مكتوب عليها سيكو سيكو لو سألته دي بكام؟ هيقولك دي بسبعة جنيه ممكن تفاصل لحد تلاته جنيه.. علي فكرة العلبة مش فاضية من جوه ولا حاجة بالفعل فيها كريم.
لو دققت النظر هتلاقيه الكريم الأسود بتاع زمان اللي كنت تلاقيه مرمي في التلاجة بعلبة بلاستيك معفنة.. سبحان الله العليم القدير اللي إدي العلم للعلماء والباحثين البريطانيين اللي خلاهم يكتشفوا إن للكريم ده تأثير علي الحالة الجنسية.
طبعا أنا ذهلت لما لقيت إن العلبة كمان فيها نشرة طبية زي بتاعت الأدوية المحترمة اللي بتشتريها م الصيدلية ولكن أهو.. علّم الإنسان ما لم يعلم.
توقيع: في عمق الحياة
المدونة علي مسئولية صاحبها