أبوتريكة والمسيح الدجال

"البلد هاتولع.. دول بيلعبوا بالنار.. هم مش عارفين مين أبوتريكة.. لو أنت فاكر إن الموضوع ده".
حايعدى تبقى غلطان.. أبوتريكة وراه ملايين حا يخربوا الدنيا.. عايز تتأكد خش على النت وشوف كام مليون هاشتاج مع النجم الكبير.. ولسه إنت شوفت حاجة.. يا حبيبى دا قرار النائب العام والتحفظ على أموال النجم بتاعك مجاش من فراغ.. القضية اللى عايز افهمهالك بص يا أستاذ أنا فاهم كل حاجة الحكومة جابت موضوع أبوتريكة علشان تدارى على خيبتها التئيلة فى موضوع تلوث وتسمم الميه ولا الأسعار اللى ولعت والناس مش لائية تاكل ولا الكهربة ومصيبتها السودا اهى اطعت النهاردة عن التليفزيون فى ماسبيرو.. ياعم هشام خلى دماغك كبيرة هو أبوتريكة نزل من السما.. معلش يا بيه دا رمز وبصراحة الحكاية مش داخلة دماغى.. تركت هشام وهو شاب يدير قهوة صغيرة أمام الجريدة ودخلت إلى صالة التحرير فوجدت نقاشًا وحديثًا بين الزملاء حول موضوع أبوتريكة انتهيت من تصحيح مقالى وذهبت إلى الميكانيكى لإصلاح السيارة
..رفع الأسطى السيارة بالكريك ودخل تحتها وبينما راح يضبط الفرامل فإذا به يفتح معى موضوع أبو تريكة.. يابيه أنا عارف إنك صحفى رأيك إيه فى اللى حصل مع أبوتريكة.. يا أسطى أنا عارف إنك أهلاوى متعصب ورأىى مش حايعجبك خلص العربية وبعدين نتكلم..يا أستاذ إحنا بنتسلى.
وعمومًا أنا معاى ربع ساعة واخلص بس لازم تروح لبتاع ظبط الزوايا فى باب اللوق.. طلعت على باب اللوق ونزل الراجل فى المجرة تحت العربية..تشرب شاى ولا قهوة يا أسطى هات شاى يا زملكاوى يا ألة.. إنت فرحان فى أبوتريكة.. أيوة فرحان هو على راسه ريشه دا مبارك اتحاكم ودخل السجن ومرسى فى السجن.. يا أستاذ سيبك من كلام الأهوجى رأيك إيه فى اللى عمله النائب العام والتحفظ على فلوس وشركة أبوتريكة دا قرار نيابة ومن حق أبوتريكة يتظلم وأنا عرفت إنه اتظلم النهاردة.. ما علينا خلصت العربية وروحت وجلست أمام التليفزيون أتابع النشرة.. سألت فين على جه من الدرس.. جه وصابح عليه الامتحان وسايب المذاكرة وشغال على النت.
يا بابا أنا كنت باشوف موضوع أبوتريكة يا دى أبوتريكة اللى مش حانخلص منه الولد ساب النت وساب الكتاب وجه هو وامه ودخلوا مع العبدلله فى جدل مزعج.. هل أبوتريكة إخوانى فعلاً؟ طيب لما هو إخوانى سابوه لحد دلوقتى ليه؟ وليه يا يصادروا فلوسه؟ وهو صحيح كان بيمول الإرهاب؟ روح يابنى ذاكر الساعة عشرة وما فتحتش الكتاب.. معلش يابابا أنا عايز أفهم.. نعم يا على أبوتريكة إخوانى وأى إخوانى بيتبرع بنسبة من دخله للجماعة شهريًا ودا معروف عن الإخوان من زمان وما حدش بيخالف حسب السمع والطاعة وبعد حكم المحكمة بأن جماعة الإخوان هى جماعة إرهابية من حق الدولة تصادر أموالها وأموال أعضائها وبعدين الموضوع كله فى يد القضاء.
ارتحت روح ذاكر.. لم أخلع ملابسى بعد والساعة دخلت على 11.. وبدأ حديث المساء والليل وطوله مع زوجتى العزيزة.. اسمعى اوعى تفتحى موضوع أبو تريكة تانى حرام عليكى أنا من صباح ربنا كل ما روح مكان مافيش كلام إلا على أبوتريكة هو إيه؟! الناس انهوست دى فتنة ولا فتنة المسيح الدجال اللهم سلم حفظ الله الوطن.