خليك كووول: سلامتك يا حمار

يوم الخميس اللساعة 5 المغرب كنت نازل رايح الشغل .. وركبت العربية .. وكان معايا جودي ولوجي ومامتهم اوصلهم في...طريق ي... وفجأة كابوت العربية خبط في الازاز وطار .. لورا ... وقع علي عربية كارو بحمار .. والحمار وقع علي الارض ... هههههههههههه والناس اتلمت مخضوضة علي الحمار .. وصاحبه بيقولي حرام عليك ... قلت هو انا اللي طيرت الكابوت .. المهم الحمار طلع سليم ..
اتصلت بتاكسي جه اخدهم وانا اخدت العربية وروحت للسمكري
عند السمكري بئا .. طلعت حتة عالية ونسيت اشد الفرامل.. قوم الغربية رجعت لورا .. كان فيه قهوة .. قامت نازل خابطة الكراسي وكسرت شيشة ههههههههههههههههه .. مسخرة .؟.. وانا مزهول .. والناس بتقولي حاسب حاسب .. دوس فرامل .. طيب ادوس فرامل ازاي وانا اصلا مش جوة
المهم ... العربية لما رجعت ناحية القهوة .. خبطت واحد في ضهرة وكان هيقع بس واحد شد وحجز علي العربية ووقفها عد ما خبطت شيشة كسرتها .. القهوجي جه وبيبص للشيشة المكسورة بغيظ اوووي ويبص لي ولا سال في الراجل اللي كان هيتعور .. والناس ملمومة علي القهوجي وبيلموا معاه ازاز الشيشة وواحد بيقوله ربنا يعوض عليك .. قال لأ المعلم هيحاسبني عليها .. فجيت اقوله حسابها كام . قام الاسطي السمكري حلف طلاق اني مدفعش حاجة .. ومسكوا في خناق بعض بس بالكلام مش بالاييد ..والراجل اللي اتخبط شتم القهوجي قاله اخس عليك ناقص .. بتطمن علي الشيشة ومش بتطمن عليا
قلت لنفسي والقهوجي ذنبه ايه .. لازم اراضيه بشياكة ومنزلش حلفان السمكري .. المهم بعد شوية طلبت منه 3 عناب لي وللسمكري والصبي وضحكت معاه وصالحتهم علي بعض..وبعدها 2 قهوة وشيشة للسمكري... السمكري بدأ يشتغل في الغربية ويلحمها كهربا.. قام النور قاطع .. ماهي اصلها كانت ناقصة .. وطبعا قعدنا علي القهوة وقعدنا نتكلم في السياسة وترأست مجلس النميمة .. ماهو اصل لقب صحفي عند الناس البسيطة واولاد البلد له شنة ورنة .. وانا نقولتش طبعا اني صحفي فن ..واختلفنا كما يختلف المصريين .. جه النور بعد ساعة السمكرس شغال وانا قاعد ارغي مع الناس .. لحد ما العربية خلصت بسلام .. ودبيت ايدي في جيبي وقلت ابرز القهوجي 50 جنيه والاقيه بيحلف طلاق انه ما واخد حاجة وعيب كدة والناس يحلفوا عليا انهم هيحاسبو علي المشاريب .. والسمكري حاسبته بصعوبة ... وحمدت ربنا علي هذه الصداقا وقلت اليوم هيتعدل .. ومشيت مبتسم .. وافتكرته عدي ..بس كانت المفاجاءات مستخبية ؟؟
بعد ما مشيت من عند السمكري ... بعد خناقة القهوجي والنور اللي قطع .. اخدت العربية وقلت اجيب الاولاد من النادي .. اكتشفت ان البنزين خلاص بيقولي سلام .. طلعت علي محطة بنزين .. اول محطة مفيش والتانية مفيش والتالتة زحمة وطوابير .. قلت لازم اقف عهمل ايه يعني .. بعد ساعة الحمد لله وصلت وداق التانك طعم البنزين .. وبعد 20 لتر .. اعلنت المحطة خلوها من اي نقطة بنزين .. الناس اتجننت واتلموا علي عمال المحطة وانا واقف ومش عارف اطلع .. وبدأنا مهمة خلاص ومعلش وهما ذنبهم ايه .. وبعد نص ساعة كتب لي ربنا الخروج من المحطة علي خير .. ونحس اليوم اتاريه ملازمني
قلت ادخل اغسل وشي واكل اي حاجة واجيب الاولاد ... هوب اول مفاجأة .. الحنفية لقيتها علي فيض الكريم مفيش ولا نقطة ميه .. قعدت اضحك بدون قصد والناس افتكروني اتجننت .. وبقول في سري عدي يا عم اليوم انت
وصلت للمدام والاولاد تقريبا مكانوش عارفني .. وحسيت كدة انهم قرفانين مني .. جودي ولوجي جريوا عليا وفجة وقفو .. من غير ما يترموا في حضني كالعادة .. طبعا ريحة لعرق كانت زي الفل وشوية شحم وكدة يعني .. والمصيبة ان مكراتي اصلا ( انفة ) بتقرف من اقل حاجة
شوية وقلت نمشي بئا .. ووصلنا للعربية والساعة كانت عدت 12 بعد نص الليل .. قلت الحمد للله كدة اليوم الغريب راح لحاله .. وبس حصلت المفاجأة ؟!!
بدور العربية اللمبة الحمرا نورت .. قلت واضح ان اليوم ملمس في اللي بعده.. نزلت افتح الكابوت لقيت غطا تانل الريادير (تنك الميه ) مش موجود اصلا وفاضي .. قلت هي ناقصة وفجأ لقيت مجموعة كلاب بتهوهو .. وانا بترعب من الكلاب بدون ما اشعر سبت الكابوت (هوب ) قام نازل علي راسي .. وصرخت (أاااه ) السايس بتاع الموقف جه بيسألني عن شوية ميه اغسل وشي قلت له مفيش وبالصدفة كانت معدية عربية كارو محملة بالزباالة نزل منها ( العربجي ) ولما الكارو وقفت الناس اتلمت .. العربجي كان معاه جركن مياه كبير غسلت وشي وفوقت من الخبطة وشكرته وقلت تكملش جميلم وتملا لي التانك .. بصراحة الراجل متأخرش .. وركبت عربيتي اللي يسامحها وجيت امشي كان الكارو ادامي طبعا اتكسفت اكلكس واعديه .. بس الحمار زي ما يكون كان حاسس بيا وقف لوحده ..ورزع نهقتين .. وعديت وانا ببص عليه .. واخيرا ضحكت وانا بقول بدأت بحمار وانتهت بحمار .. ولقيت نفسي بغني والاولاد ورايا .. بحبك يا حمار.. وادركت سر احترام الناس للحمار .. عندما تجمعوا حوله وسابوني