محمد محمود عبدالعزيز لوالده: أهديك صيامي وقيامي

بعث المنتج محمد محمود عبد العزيز، رسالة مؤثرة لوالده الراحل محمود عبد العزيز، حيث يعيش المنتج حالة من الحزن بعد رحيل والده، خاصة في شهر رمضان الذي يعد أول رمضان يأتي دون وجوده.
ونشر محمد محمود عبد العزيز على موقع الصور الشهير إنستجرام، صورة تجمعه مع والده وكتب عليها قائلا: "كل سنة وحضرتك طيب وبخير يا أبويا وصاحبي وأخويا وكل ما ليا، أول مره فحياتي ماتكونش معايا وقدام عنيا طول المدة دي بس برضه كل سنة وحضرتك طيب لأني حاسس إنك بخير وفي مكان أحسن من إللي إحنا فيه بكتير".
وأضاف: "عايز أهدي لحضرتك كل حاجة بعملها سواء إنتاج أو تمثيل أو أي حاجة كويسة ممكن أعملها وتبسطك وأي خير بعمله أو بحاول إني أعمله زي ما حضرتك علمتني والسنادي بهدي حضرتك صيامي وكل ركعة وكل حرف هقرأه من المصحف الشريف اللي حضرتك مكنتش بتسيبه، ربنا يتقبل مني ويقدرني وابقى ربعك في أي حاجة".
وتابع: "رمضان كريم. كل سنة وحضراتكم جميعا بألف صحة وسلامة وخير وربنا يريح قلوبكم ويشفي كل مريض ويرجع كل بعيد ويصبر أي واحد موجوع ويهون علينا جميعا يا رب بحق الشهر الفضيل".
وطالب متابعيه بقراءة الفاتحة لروح والده، قائلا في نهاية تدوينته: "(اسألكم الفاتحة والدعاء لأبويا ولأمواتنا جميعا)".