ياعم بلا خوتة / عصام سرور

*عصام سرور

اية اللى احنا عايشين فية دة سيرك ممكن مسرحية هزلية ممكن تراجيدية تمشى برنامج الكاميرا الخفية احيانآ واتفرج ياسلام عالدنيا ياسلام قالك إية قالك أة اللعبة دى كانت فى باريس بخمسة ليرة وفى لندن بعشرة استرلينى وكرامة لام هاشم عملناها بقرش والأربعة باربعة صاغ. بقينا بهلوانات بغبغانات تحصل المصيبة من دول هاتك يا صويت حاجة كويسة هيييييييه وبعدها خخخخخخخخ طيب اية اللى عملناة بعد كده علشان نمنع المصايب وتستمر الفرحة ولا حاجة الدنيا كلها ماشية واحنا كمان بس همة لقدام واحنا لورا .

وابورى رايح رايح وابورى جاى معرفش مين اللى رايح ومين اللى جاى راح ملبسهم فى بعض سخرية الفنان سمير غانم من حوادث القطارات فى مسرحية موسيقى فى الحى الشرقى من اكتر من اربعين سنة تطلع تصريحات المسؤلين تقصير وإهمال طيب التقصير والإهمال مالوش اخر ولا هو كورس موعودين بية طيب منقفلها وكفى المؤمنين شر القتال أيه آخرة الكلام ده اركب ولا ماركبش طيب قبل مااركب اكتب وصيتى ولا اتريث حد يفهمنى .

-امشى فى الشارع سايق او على رجلك مولد سيرك عينك فى وسط راسك من الشمال رايح على اليمين من اليمين رايح على الشمال ده ماشى قدام وده راجع لورا ناس ماشية وسط العربيات كأنها بتتمشى على الكورنيش غير العجل والموتسيكلات والتكاتك والكارو والتريسيكلات والمناديل والجرايد والبخور وخدلك عقد فل يابية وعلق فى المراية كل دة فى وقت واحد نصوت هاتك ياصويت زيادة نسبة ضحايا حوادث الطرق يا لهوى بس عندى سؤال هية فين الطرق .

-نيجى لهوجة الفتاوي الدينية النقاب حلو حححلو وحش وحححش مرة يطلعلك بجبة وقفطان ومرة يطلعلك ببدلة وجرفتة ومرة يطلعلك من التلاجة طيب ماكلنا عارفين ان الحلال بين والحرام بين وربنا ادلنا عقل نميز بية الصح من الغلط والحلال من الحرام نعمل الصح اللى ربنا امرنا بية واللى الرسول علية الصلاة والسلام وصانا بية نعمل اللى الصحابة عليهم رضوان اللة كانوا بيعملوة لكن ليه يالهوووووووى .

- ماتش كورة بين دولتين عربيتين بقى معركة حربية على النت صفحات الجرائد القنوات طيب نسكت شويه ليه اتهامات بالرشوة و الخيانة و العمالة خلاص مشاكلنا كلها اتحلت هنا وهناك فيه حاجات كتيرة ممكن نتكلم ونفكر فيها اهم من الكورة طيب ماتيجى نفكر ولوك لوك لوك لوك فى الصحراء الغربية إزاى نزيل الالغام منها إزاى نخضرها إزاى نعمر سيناء إزاى نحل مشكلة المرور إزاى نحب بعض إزاى نحترم بعض إزاى نشتغل بما يرضى اللة إزاى نأمن مستقبل اولادنا علشان ميدعوش علينا وزى ماأحنا بنيناها ا بالى عملوه جدودنا همه هيتباهوا بخيبتنا ممكن نعمل الكلام ده ولا أقول لكم نأجل الكلام ده لحد بعد يوم 14 نوفمبر هيييييييييييية مصر مصر مصر .



essam.sror@gmail.com
كاتب من مصر