إسمك إيه؟؟؟

إسمى صابر شاكر حامد راضى
لما بتسأله إسمك إيه ؟؟
كان بيرد وهو بيضحك
م السخريه..
صابر شاكر حامد راضي
إسمي الكامل
بس في نفس الوقت صفاتي
صابر شاكر حامد راضي..
اما الرقم القومي بتاعي
سبعه وصفر وصفر وصفر
ودي تركه أبويا وأجدادي
عمك صابر
كان بواب لعماره كبيره
ناصيتها بتشوف بحرين
وفموقع متميز جدا
علشان كده دايما مرصوده
ومحسوده وعليها العين
كان الدور الأول ساكن
ناس مستوره
أما الدور التاني ده كان
للباشا أبو نسر ودبوره
والدور التالت كان ساكن
الحاج / محمد رضوان
كانت دقنه لغايه بطنه
وزبيبته فقورته كانت نور
وبتنطق تقوي وإيمان..!!!
أما الدور الرابع كان
مليان بالقوات
كانوا بيحموا حدود عمارتهم
بجنود ويّا عتاد
أخر دور كان صاحب الليله
والهانم وولاده الجوز
كانت أوامرهم إشارات
هي إشاره لعمك صابر
كان يلحس بالذل بلاط...
صابر كان عبد المأمور
وإبنه البكري ده كان مُتعلم
قاله يابويا ما تيجي نثور..؟؟
صابر قاله عليك انا اخاف
ده أنت البكري ونور العين
وانا أيامي بقت معدوده
لو ياضنايا حصلك حاجه
اللي يربي أخواتك مين ؟؟
رد يابويا معدش فيه خوف
أخواتي وماتوا من الجوع
وأنا من فقري بقيت موجوع
خلصت ياابا بقينا بنشحت
والجوع خلي الخوف ممنوع..
صابر سلم لله أمره
وأخد ابنه البكري وثار
بعد شويه أنضم معاهم
أعداد ياما من الثوار
نزلت ناس مالدور التاني
وضربت نار..!!
والدور الاول كان كله
عالكنبه متابع الاخبار
والحاج / محمد رضوان
بزبيبته المليانه إيمان
كان مستني يشوف الغالب
ويكون وياه من الأنصار..!!
والدور الرابع بحياده
كان مشكوك فيه وف نياته
علشان كان واقف يتفرج
والدم مغرق بياداته..!!!
عمك صابر وسط الزحمه
لقي كام نسر بيهبشوا فيه
وإتجرجر عالدور التاني
طبعا بعد ما غموا عنيه
وإتوجهله سؤال تقليدي
إسمك إيه..؟؟؟
رد وهو فوسط دموعه
صابر شاكر حامد راضي
إسمي الكامل
لكن وحياه رحمه إبني
مش هتكون من تاني صفاتي
صابر شاكر حامد راضي...