"شباب الإسلام" يقاطعون دراما رمضان من خلال" الفيس بوك"

أطلق عدد من شباب الفيس بوك مؤخرا حمله كبيره تهدف إلى مطالبة المسلمين بمقاطعة مشاهدة التلفزيون فى رمضان خاصة المسلسلات التي اعتبرها الكثير منهم مبتذله ولا تليق بالشهر الفضيل ، وكذلك مواجهة الحملة الشرسة لإلهاء الصائمين عن التعبد وذكر الله .. وعن هذه الحملة يقول شباب الفيس بوك ..
شيرين محمد 19 سنه : كلنا فى الحملة بنقول بصوت واحد مش هنشوف مسلسلاتكو لأن رمضان أغلى عندنا بكتير من التفاهات دى .
ويقول محمود عبد الرازق 22 سنه : يقوم أعداء الله حاليا من بني جلدتنا بالتجهيز لأكثر من 100 مسلسل رمضاني ...وذلك في إطار سعيهم للصد عن سبيل الله بعد أن رأوا بعد الشباب عنهم واتجاههم للمساجد وامتلاء الشوارع بالمصلين في رمضان -- ولكن هيهات !!!
فأبناء الأمة استيقظوا من نومتهم وإن شاء الله لهم بالمرصاد .. لمقاطعة هذه التفاهات ...فكل لحظه من رمضان غالية جدا ...ولا يمكن التفريط فيها !!
ويقول أسامه نور الدين 20 سنه : مين فينا مش بيتمنى إن ربنا يتقبل منه صيام وقيام شهر رمضان !!!؟؟؟مين فينا نفسه ربنا يتقبل منه الأعمال الصالحة في رمضان ومضاعفة الأجر والحسنات إلى مئات بل آلاف الأضعاف!!؟؟ :: زى إفطار الصائم ... بر الوالدين .... قراءة القرآن ... الحرص على الصلوات في جماعه وكذلك صلاة ...الفجر !!!؟؟؟ إلخ ... معقولة نسيب كل الطاعات دى ونروح لمسلسلات وبرامج رمضان اللى " مابيجيش " من وراها غير الخراب والمعاصي ؟؟
تقول رانيا عبد الرحمن 23 سنه : رمضان من أعظم شهور العام وقال رسول الله رجب شهر الله وشعبان شهري ورمضان شهر أمتى . فأين انتم يا امة محمد من شهر رمضان ؟ هل مسلسلات رمضان أهم من التقرب الى الله؟
يقول محمود محمد 19 سنه : انا مش فاهم ايه هوجة المسلسلات اللى بتزيد سنه عن سنه دى ؟ الواحد بيستنى شهر رمضان علشان يحترم نفسو شويه ويبتدى يصلَح " البلاوى " اللي بيعملها طول السنة بيجي شياطين الإنس يلهونا أكتر .. أرحموناااا بقااا
وتساءلت أميره محسن 24 سنه : ليه نفسد كل فرصه ربنا أدهالنا فى رمضان من خلالها ممكن ربنا يعفو عنا ويغفر لنا ويرحمنا ؟ ليه نفسد كل ده بقضاء عشرات الساعات امام التلفزيون والنظر إلى مشاهد قد تكون مخلة بالدين والأخلاق !!!!ليه نضيع أفضل شهر في السنه !!!ليه نضيع ليلة خير من ألف شهر !!!
تقول شيماء السيد 25 سنه : أتخيل معايا إنك شفت كل مسلسلات وأفلام رمضان ومفوتش ولا حلقه ! طيب وبعدين !!!؟؟؟استمتعت !؟ أكيد طبعا !!؟؟ طيب وبعدين !!؟؟إيه الفايده اللي هترجعلك !!؟؟
طبعا مفيش -- ولا في دنيا ولا في دين ... بل على العكس طلعت بأوزار وأثقال لا يعلم بيها إلا الله سبحانه وتعالى.
يقول عبد الرحمن سعيد 22 سنه : ياشباب ياللي بتشكوا من الهموم والأحزان المستمره !!!
رمضان فرصة العمر .... ياريت نستغل الفرصه لأن المسلسلات مش هتشفعلنا يوم القيامه بل عملنا الصالح .
تقول سمية عبد الله 18 سنه : مسلسلات السنه دى أكثر ابتذالا من كل عام يكفى وجود بطلات الأفلام الإباحيه والمشاهد الخارجه فى مسلسلات هذا العام فأى عقل يقول لنا كيف نشاهد هؤلاء فى شهر معظم يسعى جميع المسلمون فيه الى اقتناص الطاعات ؟