عمر كمال: "بيقولولي فلوسك حرام وعايز حد من الأزهر يرد عليا"

أعرب المطرب عمر كمال عن استيائه الشديد، بسبب انتقادات البعض له، وحديثهم أن الله لن يقبل منه فعل الخير، لأن مصدر أمواله من الغناء، حسب قولهم.
وقال "كمال" من خلال مقطع فيديو نشره عبر حسابه بموقع "فيسبوك": "السلام عليكم، أنا مش بعمل فيديوهات خالص، بعمل فيديوهات في الغناء والكلام ده، عمري ما عملت فيديو في الخير علشان أطلع عليه تريند، مبحبش كده خالص، ومقتنع أن الخير اللي في السر ربنا بيكرم أضعاف عن اللي في العلن".
وتابع: "أنا ربنا كرمني أخر كرم علشان أنا علاقتي بربنا كويسة أظن ذلك، بس أنا بجد تعبت من الناس، تعبت نفسيًا أوي، عايز حد من الأزهر يطلع يرد عليا، بيقولولي معنى الكلام ربنا طيب لا يقبل إلا طيب، أنا بعمل إيه غلط، أنا بروح أغني في فرح بفرح الناس، بروح أغني في عيد ميلاد، أو في حفلة تخرج، أنا ك عمر كمال عمري ما طلعت في حياتي في لايف ولا فيديو قولت أنا بعمل خير، اللي عايز يعمل عملية بعمله، واللي عايزني أساعده في إيجار بعمله، واللي بيته محتاج سقف بعمله، أنا بعمل اللي أقدر عليه".وأضاف "شايل مسئولية 50 أو 60 فرد، فرقتي واللي شغالين معايا وأهلي، أنت بقى عملت إيه، ويقولولي أصل أنت فلوسك حرام، أنا فلوسي حرام بساعد بيها غيري، يعني اللي عايز يغسل كلى مرتين تلاتة في الشهر أنت عملتله إيه، أنا عملتله، واللي سقف بيته واقع والشتا داخل علينا أنت عملتله إيه قولي، أنا عملتله".
وأضاف: "أنا عايز أعرف من أي شيخ في الأزهر، أنا بعمل خير، بجيب من هنا وأحط هنا، ده غلط ولا صح حد يقولي، مين فينا اللي صح هما ولا إحنا، لو أنا غلط هبطل أعمل خير خالص مش عايز أعمل خير تاني، علشان أنا تعبت نفسيًا، كل شوية حد يقولي الله طيب لا يقبل إلا طيب، أصل أنت مش هيتقبل منك، أصل أنت فلوسك مش عارف إيه، طيب أنت عملت إيه، أنا شايل فرقتي وأسرتي والسواق بتاعي وأخواتي وعائلتي، يارب كل واحد في المجتمع يبقى زي عمر كمال يشيل شوية من اللي عليه مكانش حد هيبقى فقير".
واستكمل: "كل ما أتكلم في حتة يقولولي أنت نجحت في إيه، أنا نجحت في المجال اللي أنا عايز أنجح فيه، أنا نجحت في إني أجيب عربية اللي بحبها، أنا نجحت في إني أعيش أهلي عيشة كويسة، أنا نجحت إن فرقتي 25 فرد، منهم ناس محتاجين علاج وطرف صناعي، وغسيل كلى، وناس محتاجين إيجار، أنا نجحت في كده، أنت مش عايزني أنا ابعت، أوكيه أنا مش هبعت أي حاجة، أنا فلوسي حرام، أنت هتبعت، أنا مش فاهم".
جدير بالذكر أن عمر كمال يستعد لإحياء حفل غنائي جديد في دبي بدولة الإمارات العربية المتحدة، يوم الجمعة الموافق 18 أكتوبر الجاري.
اقرأ أيضًا:
شيرين عبدالوهاب توجه رسالة لطفل بمستشفى 57375 لهذا السبب
"مرشحة عصرنا".. جيمي لي كرتيس تواصل دعم كامالا هاريس في سباق الانتخابات الرئاسية الأمريكية
صور طريفة من فترة شبابها.. إلهام شاهين مع شقيقها أمير وإلهام صفي الدين: "كانت أيام حلوة"
نيمار يقدم التحية للمستشار تركي آل الشيخ في افتتاح "موسم الرياض"