وزير المالية عن أزمة كورونا: بعضنا كان بيقول نقفل زي الدول وندي الناس فلوس

تحدث محمد معيط، وزير المالية، عن صعوبة الظروف الاقتصادية التي مرت بها مصر خلال السنوات الاقتصادية نتيجة الأزمات الداخلية والخارجية ومنها أزمة فيروس كورونا المستجد.
وقال وزير المالية، خلال اليوم الأول من مؤتمر حكاية وطن، السبت: بعضنا كان بيقول نقفل زي ما الدول قفلت وندي الناس فلوس، وبعضنا قال مش هنقدر، ساعتها الرئيس قال هنعمل إيه، السياحة قفلت والمصانع قفلت ومفيش استيراد ولا تصدير، وكان القرار هنقفل جزئي مش هنقدر نقفل كلي، ودعمنا قطاعات قفلت، خسرنا 400 مليار جنيه وصرفنا فوقهم 200 مليار جنيه.
وأضاف: أنا فاكر إنك "السيسي" سألتني، هي المالية العامة للدولة تقدر تتحمل ده أد إيه؟، قولت سنة، بعد كده مش هنقدر.
وتابع: مكناش عارفين إن شركات البترول والشحن هتعمل إيه، اللي هيعمل خسائر هيبقى عايز يعوض بعد كده، مكناش عارفين إن ده هيعمل تضخم كبير، ويعمل ارتفاع في الفايدة والأموال تخرج من الأسواق الناشئة، وإن العملات المحلية هتعاني، مكناش عارفين إن أسعار البترول هتبقى سعرها يعدي 144 دولار بعد ما كانت بتتباع بالسالب، مكناش عارفين إن فيه حرب هتقوم، كان أملنا إن كورونا تنتهي عشان نتعافى، الرئيس كان بيسألنا، هنعمل إيه وهنعمل مشروعات؟ الرئيس قال مش هنقدر نقفل بيوت الناس، خلي المشروعات شغالة وناخد حذرنا.
وواصل وزير المالية: ضخينا أموال عشان الناس تقدر شغالة، برميل البترول اللي حاطه في الموازنة ب60 دولار النهاردة ب94 دولار، كنا بنجيب طن القمح ب250 دولار دلوقتي بأكثر من 500 دولار، كل ده ضغط علينا، عشان بنجيب الحاجة بضعف سعرها، كل ده حط الجنيه المصري تحت ضغط، كان تصوراتنا نستحمل سنة، مكناش عارفين ده كله، العالم برة لما السيولة زادت رفعت الفائدة، وضر كل الدول الناشئة والنامية، كانوا خارجين من أزمة واضطروا يستدينوا.
وأشار إلى أن الرئيس منذ 5 أبريل 2020 كان قلقا على ما أنجزناه من إصلاح، موضحا: حبيت بس أقول تفسير عشان نبقى موجودين مع بعض، مهياش التفسيرات اللي بتترد لكن الأزمة طالت.
ويُعقد المؤتمر بحضور الرئيس عبد الفتاح السيسي، وعدد من الوزراء، والسياسيين، والشباب والإعلاميين وممثلين من جميع فئات المجتمع.
تغطية مباشرة لمؤتمر حكاية وطن.. لحظة بلحظة (اضغط هنا)