"بحب أقلد لبلبة وشادية ضربتني بالقلم".. أبرز ما قالته يسرا مع "أبلة فاهيتا"

حلت الفنانة الكبيرة يسرا، ضيفة ببرنامج "لايف من الدوبليكس" الذي تقدمه أبلة فاهيتا، على قناة on، وكشفت خلال الحلقة عن تفاصيل عديدة في حياتها قبل إعلانها الإصابة بفيروس كورونا.
نرصد لكم أبرز ما قالته يسرا في التقرير التالي:
- "اسمي (سيفين) وده معناه الوردة التي لا تموت أو لا تذبل، ودلعي في البيت( سيفا) ، وأنا برج الحوت وصفاته إننا طيبين وجدعان أوي، بس يا لطيف علينا لو قلبنا".
- "اتعلمت وأنا صغيرة إني لما ألاقي حد أكبر مني أقوم وأسيبله المكان بتاعي، وأول مرة قلبي دق كنت في المدرسة قلت ابتدي بدري، وكنا بنتقابل في المدرسة".
- "بحب السهر وأخرج وأشوف أصحابي، وجوزي ملهوش علاقة بالخروج خالص، لكن بيستناني حتى لو التصوير طول للفجر أو للصبح".
- "بخاف على جوزي من الحسد لأنه ملهوش زي، أنا حتى خايفة أحسد نفسي عليه، وربنا يخليه ليا".
- "كنت أعرف جوزي من وإحنا عيال صغيرة عندنا 7 سنين، وبعدين اختفى وأنا اختفيت، وهو سافر بره وعاش 20 سنة واتجوز وطلق ورجع، وأنا قفشته بقى واتجوزنا بقالنا 25 سنة".
- "لو كنت حيوان، كنت أحب أكون حصان.. (فرسة) يعنى".
- "أعرف فاتن حمامة، وكنت لما بحتاج نصيحة بكلمها وعمرها ما بخلت عليا، وكنت لما باخد رأيها عمرها ما تقول الحل ولكنها بتفتح سكة تكملي انتي بيها بطريقتك".
- "فاتن حمامة، كان لها لقاء قديم بيسألوها، اتعلمتي إنجليزي وفرنساوي منين؟.. وقالتلهم من الراديو، رغم إنها كانت في مدارس عربي".
- "لي أصدقاء كثيرة قريبة مني، منهم إلهام شاهين وإيناس الدغيدي وليلى علوي.. وأكتر حد بحب أقلده لبلبة".
- "كنت مع شادية في فيلم (لا تسألنى من أنا)، وضربتني قلم طيرت وشي وراح مني الكلام، ومعرفتش أنطق رغم إن إيدها صغيرة، وكانت مسمياني غروم".
- "كان نفسي أتجوز براد بيت، ولو اتقدملي مكونتش هرفضه، بس أنا منكرش إن أحسن حاجة حصلتلي إن زوجي خالد سليم اتقدملي لإني بحبه جامد أوي".
- "أكتر فيلم تسبب في شهرتي كان (ليلة شتاء دافئة) مع عادل إمام ، وعمل نجاح ساحق وقعد 36 أسبوع كومبليت، وكان بيتعمل حفلات منتصف الليل".
- "بعترف إني نجحت من خلال عادل إمام، وعمري ما نكرت الكلام ده، وبحب شكلي في أفلام كتيرة زي (الإرهاب والكباب وطيور الظلام ودانتيلا والوردة الحمرا وشربات لوز".
- "أكتر مشهد عدناه كان في فيلم (الإنس والجن) لما عادل إمام بيقولي هاسخطك، وفجأة فضلنا نضحك، وكانت أمينة رزق المفروض تتدخل بعد كلام هيتقال وبسبب إنها مسمعتش الكلام ده، فضلت واقفة كتير على الباب وقالتلنا سايبني كل ده واقفة بقالي 3 ساعات، وبتتضحكوا.. إيه قلة الأدب دي".
- "أتمنى السنة الجديدة، ميكونش فيها أمراض ووباء، والناس تعيش في سلام وصحة وعافية وأمان".
- "عادل إمام بيخلي كل اللي حواليه مبسوطين سواء طولنا في التصوير أو لأ، وكل الأجواء بتكون حب وهزار وبياخد رأي كل الناس ويسأل على المشهد حلو ولا وحش".
- "يوسف شاهين أكتر بني آدم يقدر يطلع من الممثل اللي قدامه اللي هو عاوزه".
- "أول فيلم عملته مع يوسف شاهين، كان (حدوتة مصرية) وده الاسكريبت الوحيد اللي مفهمتش منه حاجة، وقريته 10 مرات، وقلتله أنا مش فاهمة حاجة وماشية، ومشيت وروحت عند خالتي ولقيته جالي ودخل علطول على غرفتي وخالتي قالتلي مين المجنون ده، وإزاى يدخل عليكي كدة".
- "رشدى أباظة، كان شيك وذوق ومفيش حد زيه في معاملته لأي ست".
- "عمر الشريف، كان حدوتة مش هتتكرر، وكان كاتم أسراري".
- "أحمد رمزي.. كان دمه خفيف جدا وجدع".
- "لو كنت راجل، كنت اتجوزت سعاد حسني، أو مديحة كامل، أو نادية لطفي".
- "آخر كتاب قرأته هو (قواعد العشق الأربعون) ، وهو أكبر وأسرع كتاب قرأته في حياتي".
- "ركبت مرة مع صالح سليم في الطيارة وكنا رايحين للسعودية، وجات مضيفة وهي شايلة الأكل ولقيتها بترتعش، بقولها مالك، قالتلي (أتجوزه ليلة واحدة، واطلق بعد كدة مش مشكلة) ".