رسائل للمصريين.. ماذا قال الرئيس السيسي بعد وصوله مطار القاهرة؟ (فيديو وصور)

وصل الرئيس عبدالفتاح السيسي، إلى مطار القاهرة الدولي، صباح الجمعة، بعد زيارة للولايات المتحدة الأمريكية شارك خلالها في أعمال الشق رفيع المستوى للدورة الرابعة والسبعين للجمعية العامة للأمم المتحدة.
وحرص الرئيس السيسي على تحية المئات الذين تواجدوا بمطار القاهرة لاستقباله صباح اليوم، قائلًا: "أهلا بيكم".
كما وجه الرئيس عدة رسائل إلى المصريين في حديث تلفزيوني لدى وصوله إلى مطار القاهرة وتحية المتواجدين، قائلًا: "ايه اللي مصحيكم بدري الموضوع مش مستاهل خالص.. لازم تعرفوا كلكم إن الشعب المصري واعي قوي.. إزاي الصورة تترسم علشان يزيفوا الواقع ويخدعوا الناس ويضحكوا عليهم.. المصريون أصبحوا أوعى من كده بكتير.. اللي اتعمل قبل كده مينفعش يتعمل تاني.. ليه؟ علشان ربنا وعلشانكم متقلقوش من حاجة".
وقال الرئيس: "كل حاجة ماشية زي الفل، أنتوا بتسمعوا كلامهم وتصدقوه وتتعاملوا معاه على أنه حقيقة؟ الموضوع مش كده خالص.. دي صورة بتترسم زي ما اتعمل قبل كده، عبارة عن كذب وافتراء وتشويه وكتائب إلكترونية شغالة وشوية إعلام بيشتغل علشان يقدم صورة مش حقيقية، أنتوا لازم تكونوا واعيين لكده.. إحنا جامدين قوي إن شاء الله، والبلد جامدة قوي بيكم".
أضاف السيسي: "الرسالة كنا بنتكلم عنها من أسبوع قبل ما أسافر (إلى نيويورك)، وقلنا يا مصريين خلي بالكم مش هيسبوكم تنجحوا ولا تتهنوا على حاجة، هي حرب بيننا وبينهم، مجموعة قد كده، قدام شعب كله، هتصدقوهم إزاي؟ والإعلام عليه واجب كبير لتوعية الناس والتصدي للشائعات والكذب والناس البسطاء لا تتركوهم (للأكاذيب) وهما فاهمين كويس.. مصر مكانها كبير قوي وشعبها كبير.. مكانة مصر بشعبها".
وواصل الرئيس: "أقول للمصريين: يوم ما هطلب من المصريين زي يوم التفويض في 2013، رسالة للعالم كله، هينزل ملايين مش أقل من كده".