"ضربني وجرجرني وعايزة أتطلق".. أول تعليق من "سيدة البلكونة" عقب إنقاذها

روت سارة مجدي، الشهيرة ب"سيدة البلكونة"، تفاصيل محاولتها إلقاء نفسها من البلكونة هربًا من العيش مع زوجها.
وقالت مجدي، خلال مداخلة هاتفية مع برنامج "مساء DMC"، المذاع عبر فضائية "DMC"، إنها متزوجة في عمر ال19 عامًا، ومرت 7 سنوات على زواجها، وتعيش في خلافات دائمة مع زوجها، لافتة إلى أنها حاولت الانتحار وإلقاء نفسها من "البلكونة"، هربًا من الحياة مع زوجها.
وأضافت السيدة: "أخته بتتدخل في حياتي، وأنا ولدت بقالي 40 يومًا، وكل ما اتصل بزوجي عشان أرجع يقول لي: لا ما تجييش عشان الظروف، وأنا عندي بنتين وولد صغير بقاله 40 يوم، وعيالي عايزين مصاريف ورعاية، وفي آخر مرة بَعَت بنتي لأخته تقعد عندها وبعدين لقيتها بتتصل عليَّ وبتكلِّمني بأسلوب وحش وبقرف، وبتقول لي: أنا كل حاجة باعملها بمزاجي ولو عايزة أخليكي ماتشوفيش العيال هعمل كده".
وتابعت "سيدة البلكونة": "جوزي زعق لي وقال لي اتصلي بها اعتذري لها، وانا ما اتصلتش.. تاني يوم الصبح عملت فطار عشان جوزي ياكل، بص لي بصَّة بقَرف، وقال لي: أختي كل حاجة، وكل ده عشان بيشتغل معاها، قام زقّني وضربني وجرجرني في البيت.. أنا فاض بيَّا، قُلت أموت وأرتاح وأسيب أخته تربِّي عياله"، مضيفة: "زوجي مش اللي رماني، أنا مش عايزة أظلمه، لكن أنا تعبت وفاض بيَّا ومش عايزة حاجة، كفاية عمري اللي ضاع على الفاضي، متجوزة إنسان ماعندوش مسؤولية ومش عايز يتغيَّر.. أنا عايزة أتطلق بما يرضي الله".