حلت الفنانة حلا شيحة، ضيفة على برنامج "من 4 ل6" الذي يقدمه المذيع كريم كوجاك والمذيعة مها بهنسي، على راديو "نغم إف إم"، وهو اللقاء الإذاعي الأول الذي تجريه منذ تراجعها عن قرار اعتزال الفن. وفي السطور التالية، ننشر أبرز التصريحات التي جاءت على لسان حلا شيحة على مدار ساعتين.. - عن سنوات الابتعاد والتي زادت على ال10 سنوات، قالت "عملت وقفة لنفسي جرحت، ورجعت وممكن أرجع أجرح تاني حسب ما بحس، لأن في النهاية إحنا كتلة مشاعر، مش إنسان آلي، بنحس بحاجات وبنغير في حاجات محدش يقدر يقول اتعلمت كل حاجة ودي أجمل حاجة في الإنسان". - وكشفت عن انتمائها لبرج الحوت، وسعادتها بالأغنية التي قدمها المطرب عمرو دياب لهذا البرج، قائلة "فرحت بالأغنية دي حسيت إنه برج كويس وفيه أمل". - وردًا على إيمانها بالأبراج، قالت "بحس إنها صفات حقيقية لكن مش بؤمن بالتوقعات، بس بحس فعلا إن صفات الأبراج فيها حاجة صح، برج الحوت رومانسي بطبعه، عاطفي بيتأثر ببكاء الطفل، مقاتل وأعتقد إني مقاتلة، البرج معطاء وبيحب الناس أوي وكريم وأنا من الشخصيات دي". - "اتظلمت مرة ومش حابة أقول تفاصيل، لإني مش بحب أركز في تفاصيل، ومبحبش أظلم حد، وبعدي الأمور". - بتعامل مع من يكرهني بشكل عادي، ممكن ابتسم وأبقى لذيذة بس هقف في حتة معينة مش هقرب أكتر، بس مبكرهش حد. - محبة الناس نعمة من ربنا، الفلوس برضه مهمة ان الواحد يقدر يتحرك ويبسط أولاده ونفسه. - عن دورها في فيلم "السلم والثعبان"، قالت "الدور كان جميل والسيناريو كان حلو، فيه أبعاد مش حاجة لايت، كان حالة فنية ومن الأفلام اللي بحبها جدًا". - سمعت بالتفكير في عمل جزء ثانٍ من "السلم والثعبان"، وإن مؤلف العمل محمد حفظي بيفكر، بس ده شيء مؤجل، وممكن أتردد في تنفيذه لأنه لو اتكرر مش هيكون حلو. - عجبني مسلسل "جراند أوتيل"، وحبيت فيه كل حاجة وشجعني أرجع وأعمل عمل حلو زيه. - بخاف من المجهول، وأكتر حاجة بتسعدني إني أقدر أسعد إللي حواليا وأنا بطبعي متفائلة. - نفسي أعمل حالة شبهي، أكون حاساها أوي ونفسي أوصلها للناس، ويكون ليها علاقة بينا إحنا الستات. - قلت للفنان أشرف عبدالباقي نفسي أجي أعمل معاكم دور على المسرح، عمري ما وقفت على مسرح، وقالي تمام يالا تعالي، بحب المسرح لأنه حاجة مباشرة. - أنا متصالحة مع نفسي، وكل القرارات اللي أخدتها خارجة مني، بعض الردود بتبقى مش حقيقية، وفيها هجوم كأنه مدروس، وعامة مركزتش أوي في كل الهجوم، لأن لو مؤمنة بحاجة وشايفة إنها صح مش هركز هاخد النقد البناء بس، لأنك صعب ترضي كل الناس. - هناك فنانات اتصلوا بي بعد قرار العودة للفن، ومنهن "دنيا سمير غانم، درة، جميلة عوض". - أحب أقول رسالة لكل الناس إن إحنا محتاجين حب أكتر، زعل أقل، صدق، صبر، حسن ظن في بعض أكتر، محتاجين منشيلش من بعض، محتاجين يبقى عندنا شوية تفهم وتسامح ونعرف إننا مختلفين دي طبيعة الحياة.
