ليه تشك إنك متستحقش لما ممكن تشك إنك تستحق ؟

ممكن حد يقولك إنك واحشه أوي..بس مبيعملش حاجة خالص عشان يشوفك ، أو بيحبك ..بس مبيقولش .
أو عايزك في حياته ..بس مبيعملش أي مجهود عشانك .
حتبتدي تسأل نفسك ... هو بيحبني ؟
ممكن يكون بيحبك .. وممكن لأ ..بس في النهاية لازم تعرف إنك تستحق الحاجات اللي أنت بتفكر في إنك تستحقها ... تستحق يتعملك مفاجأة وتتفاجئي. تستحق تشوف حد بيعمل مجهود عشانك . تستحق تخرج و تكتشف العالم مع الشخص اللي بتحبه . تستحق مكالمة كل شوية عشان تفتكر و تصدق أنك علي بالهم . تستحق إن حد يتخانق مع الظروف عشان يبقي معاك . تستحق أنك تتحب و حد يبذل مجهود عشانك ..
حتي لو فعلا بيحبوك .. لازم يظهروا ده ليك .
المشكلة اللي بنقع فيها إن بنتفه من قيمة إن نقول للي بنحبه إن بنحبه ..بنتفه من قيمة مفجأة ليهم تفرحهم و أحيانا كمان بنتفه من مكالمة في وسط اليوم نقولهم إن هما علي بالنا .. حاجات بديهية بس للاسف كتير بيفتكر إن بديهي بعد سنين نكون عارفين كل ده و محتاجين نعمله مره واحدة في العمر و باقي العمر نفتكر ده وبس .. و ده بيوصلنا إن نشك في نفسنا و في اللي بنحبهم إن هما بيحبونا أو اننا نستحق الحب ..
فيه أكتر من حديث قريبين من قلبي عايشه عليهم ومبحسش أني بني آدمه ملزقة لما بأعمل بوصايا الرسول عليه افضل صلاة و سلام لما بقول للي بحبهم أني بحبهم :
( من كان في قلبه مودة لأخيه لم يُطلعه عليها فقد خانه ) .
و حديث تاني :
( إِذَا أَحَبَّ الرَّجُلُ أَخَاهُ فَلْيُخْبِرْهُ أَنَّهُ يُحِبُّهُ )
و حديث تالت :
( أَنَّ رَجُلًا كَانَ عِنْدَ النَّبِيِّ صَلَّى اللَّهُ عَلَيْهِ وَسَلَّمَ ، فَمَرَّ بِهِ رَجُلٌ ، فَقَالَ : يَا رَسُولَ اللَّهِ ! إِنِّي لَأُحِبُّ هَذَا ، فَقَالَ لَهُ النَّبِيُّ صَلَّى اللَّهُ عَلَيْهِ وَسَلَّمَ : أَعْلَمْتَهُ ؟ قَالَ : لَا . قَالَ : أَعْلِمْهُ . قَالَ : فَلَحِقَهُ فَقَالَ : إِنِّي أُحِبُّكَ فِي اللَّهِ . فَقَالَ : أَحَبَّكَ الَّذِي أَحْبَبْتَنِي لَهُ )
يعني مش عيب ولا تلزيق و ده يجوز مش بس بين الحبيب و حبيبته و الزوج و الزوجة ولكن لكل اللي ربنا رزقك بنعمة حبهم .. قولهم أنك بتحبهم عشان الحب نعمة و ووجب الشكر عليها عشان متغورش من وشك . آه متغورش.. اللي بياخد الناس بضمان العشرة و يبطل يعبر عن مشاعره بيولد اهمال و الإهمال بيولد كفر بالحب و العشرة .
الخلاصة :
إذا أحببت أحدًا فأخبره ليعلم , وكررها ليطمئن , واعمل بها ليوقن. - محمود درويش
ليه النبي عليه صلاة و سلام قال "تهادوا ..تحابوا" ؟ و قال برضه "تهادوا فان الهدية تذهب وحر الصدر " هو ربط الهدية بالحب .. كأنه سلاح مودة .. الهدية بتذهب الغل في الصدور و تذهب الشحناء و بتزيد المحبة .. مش بقيمتها مهما كانت بسيطة بس هي اداة بتقول فيها للطرف التاني إنك فاكره و بتحبه و عايز بس تسعده .
الحاجة البسيطة دي لما بنهملها بتدي عكس كل المعاني دي .. لأن أي واحد فينا عامل زي الزرعة ..ينفع تسقي زرعة عندك مرة واحدة و تسيبها ؟
حتموت !
هي محتاجة رعاية ! مية ! مية الروح إنك تقدرها و تديها حب و اهتمام .. متنسوش إن احنا روح و المية بتاعتنا حب و اهتمام ولما بنبطل نهتم بالحاجتين دول بندبل و الروح بتعجز و بتزعل من الإهمال و بتموت حتي لو فيها نفس .. حبوا بعض أكتر و دور علي الزرعة اللي في حياتك اللي نسيت تسقيها بقالك كتير .. كل ما حتسقيها من اهتمام و حب حيصب عندك ضعف الحب و الإهتمام اللي بتديه و هتحس إحساس حلو محستهوش من زمان .
أنت تستحق الحب .. و اللي بتحبهم كمان .