محمد محمود عبد العزيز ينشر صورة برفقة والده.. وهكذا علق عليها

شارك الفنان محمد محمود عبد العزيز جمهوره بصورة له مع والده الفنان الراحل محمود عبد العزيز، عبر صفحته الشخصية بموقع تبادل الصور والفيديوهات "إنستجرام".
وعلق على الصورة قائلًا:" برضه هتصور مع حضرتك وهتجمعنا صور جديده".
واستكمل:" بصراحة الصورة دي ماكنتش متصورها عشان انزلها على السوشيال ميديا، كنت عاملها ليا أنا بس عشان أحطها على موبايلي وأعلقها في بيتي وشركتي، بس قلت لنفسي أكيد في ناس كتير عامله زي حالاتي وليها حد غالى عليها بعيد عنها".
وأضاف:" أيا كان نوع البعد حتى لو مسافر مده طويله، "نصيحتي"، اعمل زي ما انا عملت، اتصور صورة حلوة مع صورة حلوة للشخص الغالي عليك".
وتابع:"ولو كان مسافر ابعتهاله وعرفه قيمته عندك وحسسه بحبك ليه، ساعتها أكيد هيفرح وانت كمان هتفرح وهتقصر بينكوا المسافات مهما طالت".
واستطرد:"العمر مهما طال قصير اللي انت حاسه قوله واللى بتحبه قوله بحبك في وشه، صدقني ممكن بكره ماتلاقيهوش، أما لو الغالي عليك المسافة اللي بينك وبينه أبعد من السفر، أكيد برضه هيحس وهيفرح، وانت كمان هتفرح انك معاه في صوره جديده حتى لو مع صورته".
واختتم كلامه قائلًا: "أسألكم الفاتحة والدعاء لأبويا ولكل من رحلوا عنا".
يذكر أن الفنان محمود عبدالعزيز رحل عن عالمنا يوم 12 نوفمبر 2016، عن عمر يناهز 70 عاما، وقدم الفنان الراحل للسينما والدراما باقة من أهم الأعمال أبرزها "الكيت كات"، "الحفيد"، "سيداتي آنساتي"، "الساحر"، "ابناء وقتلة"، "رأفت الهجان"، "محمود المصري"، وغيرها من الأعمال.