"اه طبعا، ما هو أنا لو كنت حد من صحابك ولا صاحبتك كنت... إلخ"، كام مرة سمعت فيها الجملة دي من أمك أو أبوك؟، كلنا أكيد متفقين إن كل الاهالي كلامهم زي بعضه، وتحس إنهم حافظينه، وبيسمعوه من بعض، بالذات في الشكوي من أولادهم. بس السؤال بقي، إنت فعلا بتهتم بصحابك أكتر من أهلك؟، يعني مثلا لو صاحبتك كلمتك، أكيد ما ينفعش ما تردش ولو مش عارف ترد، هترد تقول "معلش يا حبيبتي، هكلمك كمان شوية".. طيب لو أبوك أو أمك اللي بيتصلوا، كنت هتعمل إيه؟. سؤال كمان، لو في يوم راجع من الشغل تعبان، وقرفان، وجعان، ولقيت أمك بتقولك عاوزاك توصلها تزور حد من صحابها.. من غير ما تفكر هتتعصب وتقولها "حرام عليكي أنا راجع من الشغل طالع عيني، أنا عاوز أكل و أنام".. وصاحبتك بعد دقايق تكلمك تسألك فاضي توصلها الفرح ولا لأ، أصل أخوها لسة مرجعش من برة.. هتقولها "أكيد ، هو ده سؤال؟!"، وفي ثواني هتغير هدومك ومش هتقدر تقول لوالدتك اللي قاعدة زعلانة، غير إنك رايح تلحق واحد صاحبك عمل حادثة، و تنزل عادي تسوق في الزحمة و إنت في منتهي السعادة انك رايح لها. أخر سؤال.. إمتي أخر مرة جبتلهم حاجة، فاكر طيب أعياد ميلادهم؟، طبعا مش هسألك فاكر عيد ميلاد صاحبتك، لأنك أكيد حافظه صم وفاكر إن في أخر عيد ميلاد استلفت فلوس من أبوك عشان تجبلها هدية وتخرجها، ولسه مرجعتلوش الفلوس دي ولا هو سألك عليها أصلا. أكيد حاجة حلوة إنك تحب حد وتعبر له عن حبك ده بإهتمامك بيه، بس إنت بتعمل كده مع صاحبتك عشان تضمن وجودها في حياتك، خايف لو ما اهتمتش بيها تسيبك..خايف تخسرها.. بس عارف إن مهما عملت في أهلك حبهم ليك مستحيل يروح ولا حتي يقل وده سبب ادعي انك تعرفهم قد ايه انت بتحبهم لان عمر ما أبوك هيقول لك "يا ابني احنا ما ينفعش نكمل مع بعض". _____________________________________________________________ (ملحوظة: الآراء المنشورة في قسم "م الآخر" لا تعبر بالضرورة عن رأي موقع وجريدة "الوطن"، وإنما تعبر عن آراء أصحابها)