قال الدكتور هاني الناظر، رئيس المركز القومي للبحوث السابق والأستاذ بقسم الأمراض الجلدية بالمركز، إنه من الضروري على المواطنين اتخاذ كافة الاحتياطات اللازمة خلال الموجة شديدة الحرارة التي تتعرض لها البلاد خلال هذه الفترة، وذلك عقب اعلان هيئة الارصاد الجوية، أن درجات الحرارة ستتخطى ال 45 درجة مئوية في الظل. وأضاف الناظر، عبر حسابه الشخصي على موقع التواصل الاجتماعي "فيسبوك"، "أن الأرصاد أعلنت أن الحرارة الأيام الجاية هاتعدي الأربعين، علشان كدة بفكر حضراتكم بمجموعة من الإجراءات أولها نجهز شنطة صغيرة قبل ما ننزل الصبح ناخدها معانا واحنا خارجين ونحط فيها، برنيطة لونها أبيض علشان أول ما نقف أو نمشي في الشمس نلبسها علي طول او شمسية بيضاء خفيفة وصغيرة نمسكها فوق رأسنا خاصة من عشرة صباحا وحتي الرابعة عصرا، و نظارة شمس غامقة، و زجاجة مياه ونعمل حسابنا نشرب منها كل شوية ولو خلصت نملأها تاني". وتابع :" لابد من وضع ثمرتين خيار وثمرتين برتقال صيفي، في الحقيبة الشخصية، وناكلهم علي مرتين خلال النهار، ولابد من وجود شريط أسبرين أو بنادول لو حسيت بصداع ناخد قرصين علي طول، وطبعا لازم زي ما بقول دايما ملابسنا قطن أبيض خفيف أو أي لون فاتح واليومين دول تكون بكم طويل علشان نحمي الجلد من حرق الشمس، وطبعا الناس اللي تقدر تستعمل كريم للحماية ضروري بندهن بيه الأماكن المعرضة للشمس قبل ما نخرج ونفتكر دايما ان مفعوله بينتهي بعد ساعتين يعني لازم نحطه علي الجلد كل ساعتين اذا كنا هانتعرض للشمس اكتر من مرة خلال النهار واحسن شئ الكريمات اللي مكتوب عليها +50، وياريت نفتكر الاستحمام مرتين في اليوم وبماء بارد وليس فاتر، و ناخد بالنا كلنا من صحتنا وربنا يحمي حضراتكم من كل آذي وسوء". واستكمل رئيس المركز القومي للبحوث السابق، "طيب افرض حضرتك أو حضرتها نسيتوا أو ما سمعتوش الكلام اللي انا قلته كإجراءات وقائية وحماية، وحد منكم أو من العائلة خرج اليومين دول في الشمس وأتعرض للحر الشديد أثناء ساعات النهار وفقد عرق كثير وبعد ما رجع البيت لا قدر الله بدأ يشعر بصداع وسخونة وهبوط وعدم قدرة علي الحركة واحمرار والتهاب وحرقان في جلد الوجه والذراعين او اي اماكن تعرضت للشمس مباشرة، يعمل ايه علي طول ؟ اولا يجيب من الصيدلية محلول جفاف وأقراص أسبرين ومحلول كلامينا وكريم بانثينول، ثانيا بسرعة يدوب كيس محلول الجفاف في كوب ماء عادي من الحنفية ويشربه كله ثالثا ياخد قرصين أسبرين ويقعد يستريح في غرفة بها تهوية كويسة رابعا بعد الصداع ما يروح ويفوق من الهبوط ويقدر يتحرك بسهولة يدخل الحمام ويستحمي بماء بارد وليس فاتر ومن غير ليفة، و بعد الحمام يدهن الجلد الملتهب بمحلول الكلامينا بعد مايرج الزجاجة كويس وبعد ساعة يدهن الجلد مرة تانية بكريم البانثينول ونكرر الدهانات مرتين او تلات مرات يوميا". وفي ذات السياق، قال الناظر، " اتمني ان يحرص السادة مديري المدارس في ربوع مصر اليومً وغداً علي ابقاء التلاميذ داخل الفصول اثناء فترات الراحة بين الحصص أو بين الامتحانات وعدم السماح بنزولهم الي فناء المدرسة منعا لتعرضهم لضربات الشمس وهو أمر لا يحتاج لقرار مركزي من الوزارة وادعو أولياء الأمور ان يخاطبوا المسئولين في المدارس لحثهم علي تنفيذ هذا الإجراء الوقائي حرصاً علي سلامة بناتهم وأبنائهم".
