أصحاب المحال: المولدات بديل الاغلاق المبكر.. والشتاء ''اه'' الصيف ''لأ''

تباينت آراء المواطنين حول قرار إغلاق جميع المحلات التجارية في العاشرة مساءاً، والمطاعم في الثانية عشر من منتصف الليل كحل مؤقت لترشيد استهلاك الكهرباء.

وسيطر الأمر على اهتمام العامة، وخاصة أصحاب المحلات، مع اتجاه بعضهم لتأييد القرار بشدة، لأنه تطبيقه سيكون أكثر راحة وأمانًا لهم، ورفض البعض الآخر لخشيتهم من تراجع حالة البيع والشراء، وتعرضهم لخسائر كبيرة.

وقال " هانى محمد "، 25 سنة - مالك محل صيانه و بيع كمبيوتر، ''القرار كويس جدا و فى دول متقدمة كتير شغالة بيه مثل " الصين " ، ميزته انه هيحدد لنا الوقت بدل ما نقعد من الصبح بدرى لحد الساعه 12 قاعد مستنى الزبون اللى مش بيجى، بالاضافه إلى انه هيقلل من حجم الجريمة لان هناك الكثير من المحلات معرضة للسرقة اذا امتد شغلها إلى لوقت متأخر من اليوم

و توافقه الرأى " عفاف انور " 25 سنة، صاحبة محل ''طرح''، قائلة: "مع اعتراضى الشديد على وجود مرسى رئيسا للجمهورية، لكن القرار كويس جدا، لاننا هفتح بدرى و نفقل بدرى، الصين و الدول والمتقدمة بتعمل ده، وبعدين " محدش بيتمنى يروح البيت متأخر".

واستبعدت أن يؤثر هذا القرار على حركه البيع و الشراء، آمله فى هذا القرار أن يجعل المحلات اقل عرضه للسرقه و النهب".

أما "أحمد الشربينى" 26 سنة، صاحب محل ملابس، فكان له رأى اخر.. حيث يرى أن للقرار وجهان سواء بالنفع او الضرر قائلا " هو حلو علشان هنفتح بدرى، والزبون هيضطر يجى فى اوقات معينة، وكمان علشان البنات اللى بتشتغل معانا تروح بدرى بدل ماتتعرض للمعاكسة والتحرش، لكنه ضرره أن فى ناس كتيرة مش هتعرف تيجى، لانها معتاده على الشراء بليل، فالناس هتاخد وقت كبير علشان تتعود على كده و فى الفتره دى هتقل حركة الشراء و البيع ، و هيخلى المحلات مطمع للبلطجية "

ووافق " أحمد عيسى " 30 سنه، صاحب سوبر ماركت" على تنفيذ القرار فى فتره الشتاء فقط، لان حركة الشراء بتكون خفيفة، ولكن فى الصيف الطلب بيزيد لبعد الساعه 12، مشيرًا إلى القرار يعود بالفائدة على أصحاب المحلات التجارية الكبيرة فحسب.

و على النقيض.. يري " محمد حسن " 31 سنة، مسئول فرعى عن أحد فروع محلات التوحيد و النور أن " القرار فعلا هيوفر فى الكهرباء، لكنه مش فى صالحنا لأن الزباين مش بتيجى تشترى غير بالليل، الحركه الصبح بسيطة جدا بسبب انشغال الناس فى هذه الفترة ، وده هيأثر على حركه البيع و الشراء بالسلب، مقترحًا أن تعمل المحلات على المولدات بدل الكهرباء ".

و أيده فى الرأى " طه مصطفى " 20 سنة، بائع فى محل، معترضا على القرار " طول النهار مش بنبيع حاجة والفترة من 9 ل 11 بليل، هى اللى الزبون بيبتدى ينزل علشان يشترى فيها.

وتابع: ''على مستوى المصلحة الشخصية القرار هيقلل من رزقنا و هيخلينا نخسر، ولو بصينا على المصلحة العامة، فهو قرار جيد لانه هيقلل من الضغط على حركة المرور وهيقلل من استهلاك الكهرباء، بس لو هيطبق لازم تزيد حركة الامن فى الشوارع حتى لا تتسرق المحلات بسهولة ".

يذكر أن مجلس المحافظين وافق مؤخرًا على إغلاق جميع المحلات التجارية في العاشرة مساءاً، والمطاعم في الثانية عشر من منتصف الليل، وذلك عقب عيد الأضحي المبارك.