بسن القلم : كلام في كلام والسلام

أكتر حاجة خايف منها
إن أنطق كلمة علي لساني
أكتر حاجة خايف منها
إن بعد ما أنطقها ألاقيها مكتفاني
أقول وأقول وأقول
طب وبعدين... حاسس إن كلامي يا دوب ثواني وبيروح في خبر كانِ
كلام في كلام في كلام
طب هه.. أيوه هه قول عندك إيه تاني
بضاعتك بارت في سوق أرخص ما فيه...
إنك تلضم كلمتين مع كلمتين
وتعمل عُقْد وهم أو كلام أغاني
بذمتك هتفضل كده تبيع كلام في كلام في أي كلام والسلام ولا هتشوفلك شغل تاني
سمعك أيوه سمعك بتبرطم وبتلعن..
ياعم قوم من النوم وصحصح إنت مش شايف الناس بتعاني
صحيح كلامك عسل وشهد مكرر...
ولما بسمعه بيسلطن وداني
لكن إيه فايدته مع ناس معدتش بتسمع ولا بتقري وحالها يصعب على الإنس والجانِ
كلامك هجص في هجص صدقني
ولو عاوز تتأكد إنه ملوش أي مليون لازمة روح اشتري بيه شوية سوداني
هيبصلك الراجل ويقولك روح يا شاطر اضحك بيه علي حد تاني
هههههه وعاوز بعد كده يكون لك قيمة
في عالم بيعتبر الكلام والأدب وشغل المثقفين المتعلمين.. ولمؤاخذة.. َفي الجزمة القديمة...
أنا آسف بجد آسف سامحني يا صاحبي بس أنا لازم أقولك....
أنا عارف.. عارف... عاوز تقولي أسكت بقه وحُطْ الجزمة في بقك...
ييه يعني لازم تاخد الكلمة من علي طرف لساني.....
لأه أيوه لأه... ومليون لأه...
أنا هتكلم وهتكلم وهتكلم...
ومش واحد جاهل زيك هيعرفني قيمتي أو هيوقفني في مكاني
فبحق نون والقلم وبحق اقرأ باسم ربك وبحق الفرق بين الإنسان والحيوانِ...
قلمي هيفضل يعبر عن ألمي وألمك وعن ألم كل إنسانِ
أنا مش مسئول إني أحيانا بكلم عقول في عجول أو ناس تايهة ومش عارفه الفرق بين المجني عليه والجاني
وحتي ولو الكلمة تاهت في يوم ولفت ودارت فأكيد أكيد حترجع تاني
جايز ساعتها تلاقي صاحبها وتسلم عليه... حتي لو كنت أنا وقتها في حضن الرحمنِ....
وياريت... تقف علي قبري وتترحم عليا... وتقول:
الراجل ده مات لكن كلمته عاشت عشانك وعشاني.
#بسن_القلم