مصدر مسئول : تزويد الأتوبيسات ب " بلاي أستيشن "

بعد ما جاء لأحد المسئولين تليفون " I phone " من الإمارات وشاف الابلكيشنيز اللي ممكن تعمل أي حاجة منها، قرر انه يطور مستوي التكنولوجيا ويعمل طفرة يخلينا فرجة قدام العالم كله.
فبدأ أحدث مشروعاته بتطبيق خدمة ال " Wi-fi " في الميني باصات الخضراء من طراز تذكرة بجنيه ونص ، تذكرة بجنيه وربع، هذا إيماناً منه بأن ال " Wi-fi " اهم من كوباية المية اللي بنشرها من الكولدير وحبه لهذه الخدمة لدرجة أنه سمي أبنه الصغير علي اسمها، واعلن أنها مجانية .. بس للناس اللي قاعدة بس علي كراسي، اما اللي قاعد في العتبة اللي ورا السواق او ساند علي ماسورة أو حتي متشعلق فمش حيقدر يدخل علي الخدمة، وكان في اقتراح ان الباسورد بتاعته تبقي علي ضهر التذكرة لكن حُجبت الفكرة لان علي ضهر التذكرة في إعلان مينفعش يشيله، فقرر ان السواق عليه انه يقوم بمهمات متعددة انه يسوق ، يتخانق مع الزباين، يخترع مكان فاضي في الميني باص، يجعر في الناس لما المفتش يطلع عشان كل واحد يطلع تذكرته، يديهم الباسورد، ويراقب استخدامهم عشان محدش يستهبل ويدخل علي مواقع كده او كده في وسط الزحمة.
وعلي نحو الصعيد قرر انه يعمم تجربة جديدة علي اتوبيسات النقل العام ويعملها يفط مضيئة ، بدل ما مابيبقي مكتوب بشكل كئيب كده بالبوية، جاب شاشات من اللي الكلام فيها بيلف وحطها علي الاتوبيسات وتلاقي رقم الاتوبيس والاماكن اللي رايحها، وقرر انه يدخل فيها شوية اعلانات يعني يعني "محطة وراق العرب فيها محلات كيت وكيت وكيت وهكذا .. " ، وقرر انه يعمل في اعياد الحب والجواز خصم خاص للحبيبه يعني لما الواحد واقف هو وحبيبته علي المحطة يجي الاتوبيس واليافطة مكتوب عليها " أحمد بيحبك يامني " ويقوم الكمسري برمي الورد عليهم وتوزيع القلوب والسواق يكلكس من نوعية " بيب بيب بب بب بيييييييييييب "
وتزويد الاتوبيسات دي من جوه بشاشة حلوة فيها تعليمات الركوب، وكاميرا مراقبة بتفضح اي واحد قليل الادب، او حد اتعدي حدوده، عشان تخليه عبرة قدام الاتوبيس وينزل من الاتوبيس مطاطي ووشه في الارض وميعملش كده تاني.
وفي اتصال خاص مع هذا المسئول صرح لنا بأنه بيفكر حالياًُ في انه يضيف لمسة جمالية لمشروع " اقرا علي الطريق" اللي قرروا انهم يحطوا كتب للركاب عشان يتسلوا ويتثقفوا في الطريق، انه يضيف لكل كتاب سلسلة جنزير عيار 2.5 بوصة، من نفس النوعية اللي بيربطوا بيها الموبايلات في الأكشاك و الكوبايات في كولديرات الميه عشان محدش يستهبل ويحط الكتاب في جيبه، وأكد ان المشروع لسه تحت الدراسة، وان في مشروع تاني بانهم يضيفوا للاتوبيسات " بلاي استيشن " لزوم التسالي، وان الجيم الواحد حيكون بالمحطة عشان كله يلحق يلعب قبل ماينزل.