سخن عربيتك الأول ..!

بتسخن عربيتك ولا على طول مستعجل؟
كتير بتنزل مستعجل ومتأخر على مشوارك، بتدور العربية وتمشي فوراً ... كلام جميل ويمكن يكون عملي شوية ... بس أكيد مش عملي على طول!
هتقول إنك بتتحرك بالعربية كتير، ومش محتاجة تسخن، ويمكن تقول لي إنك لسه شاري بطارية جديدة للعربية... بس برضه كل الكلام ده مش كفاية!
فيه اعتقاد منتشر عند ناس كتير، إننا بنسخن العربية في الشتا عشان البطارية تشحن، أو لما مش بنستخدمها فترات طويلة ... وبرضه عشان البطارية ما تنامش!
الكلام ده أكيد كويس، بس فيه أسباب تانية برضه تخليك تسخّن العربية ... ويمكن أسباب أهم تخليك تسخّن العربية كل يوم قبل الاستخدام!
( كفاية فى أول مرة هتسخدمها فى اليوم وبعدين لو هتركنها فترة طويلة فى اليوم سخّنها تاني)
فيه حاجة مهمة جدًا لازم نحافظ عليها اسمها (الموتور)
الموتور عبارة عن قوالب حديد فى حديد، وبساتم حديد، وحلقات حديد، وتروس .... إلخ، يعني لو شغّلت الموتور شوية مع الحرارة والبنزين، العربية كلها هتكون زى القنبلة بس على كبير شوية!!
عشان الموتور يشتغل، بيكون فيه زيت موتور، وظيفته الأساسية منع الاحتكاك بين كل أجزاء الموتور، وبالتالي بنحافظ على الموتور والعربية.
طيب وإيه علاقة الكلام ده بالتسخين .... ؟!!
أول كل يوم، الزيت بيكون بارد تمامًا، يعني الفاعلية بتاعته بتكون مش كاملة... وعشان كده، بنسخّن العربية، ولما الموتور بيسخن، الزيت بيسخن، وكفاءة الزيت بتزيد كل ما يتعرض للحرارة والتسخين (بس أكيد لحد معين، وفي معظم السيارات الجديدة بيبقى لما يكون مؤشر الحرارة في المنتصف).
خد بالك
لما الحرارة بتزيد الزيت بيسخن ويتمدد، ولما الزيت يتمدد، بيملا الفراغات ويمنع الاحتكاك بين أجزاء الموتور، لكن لو اتحركت بالعربية من غير تسخين، فلحد ما الزيت يسخن، هيحصل تآكل بين أجزاء الموتور، ولما الزيت يسخن بعد كده، هيوصل لأماكن التآكل دي، ومع الوقت والتكرار، يوصل لغرفة الاحتراق بالموتور!!
وبالتالي حاجات كتير هتحصل ... ويظهر الدخان الكثيف من العادم ...
وعشان ما يحصلش كل ده ...... سخّن عربيتك.