حب خالي من الزمن

وماتسأليش خلاني إيه...
حبيت؟.. عشان ماعرفش إيه؟..
ماعرفش غير إني في يوم..
ما عشقت قلب جريت عليه..
قدِّمت كل فروض ولائي..
وكنت باقي كتير عليه..
و(كنت) مش معناها إني..
خلاص بغيَّر رأيي فيه..
بالعكس جاي علشان أقول لك..
خايفة لَتفارقيني ليه؟..
أنا كل ما أسأل نفسي ألاقي..
الحب خالي من الزمن..
مطرود من الدنيا ولاقيت..
قلبك دفا وحضن وسكن..
عيِّل يفرَّط في الأمان..
إزاي؟!.. وبعد ما كان سكن؟!
الحب للعاشق بيشبه..
للرضيع شوق اللبن..
وأنا إبن قلبك..
وإبن رسمة ضحكتك..
واحد وصادف نفسه..
بس في سكتك..
خاصم كلامه عشان..
سمعتيه سكِّتك..
قولة بحب ودمعة..
توصف فرحتك..
من قبل نطق الحكم جيتي
تمام في وقتك..
أنا قولت قبل الكل
من الأحزان سلامتك..
وساعتها شوفت عينكي باصة..
قولت آه..
قولت آه لو أكون فهمتك..
قولتي آه.. مكسوفة مني..
قصاد مرايتك..
مستغرباني إزاي عشان..
جيت لك.. صارحتك؟..
وبتسأليني أعرف منين..
قلبك يطمن يؤتمن؟!
أنا حبي ليكي حب واهب
قلب عاشق للوطن..
والحب مش محتاج مبرر..
الحب مش محتاج تمن..
هستنى منك إيه قصاد..
إحساس وقلبك بيه أذن؟..
آدي الميزان والكفتين..
وريني مين هيقول وزن؟!..
حبيت خلاص ما اطلبش غير..
إحساس وقلب كبير إذَن...