محمد زايد يكتب : مصر والملاهي

زمان لما كنت بروح الملاهي كنت أول حاجة عيني بتقع عليها وهبقى هموت وأركبها كانت العربيات المتصادمة !! مش عارف ليه كنت بحس لما أركبها أني ملكت الدنيا وبعد كل مرة كنت بكتسب خبرة أكتر وأعرف أمشي بعيد عن الناس براحتي وتطلب معايا رخامة بعدها وأفضل أخبط في الناس اللي جنبي ..رخامة كده !! لكن بعد فترة وبعد كام سنة لما تطورت المتعة واللذة بالنسبة لي اتغيرت فكرة العربيات دي واتحولت لحاجات تانية كتير منها الصح ومنها الغلط ..منها المألوف ومنها الغريب لكن في حالة اتطورت المتعة واللذة دي وأصبحت شئ تاني خالص اسمه سياسة ..يبقى هنا في خطر ونقطة ومن أول السطر وتعالوا نتكلم...
في الفترة الأخيرة بعد الثورة أصبح الكلام في السياسة وحرية التعبير حق مشروع لكل واحد فينا لكن عبر زي ما أنت عاوز وأتكلم زي ما أنت عاوز وفي ناس تانيه برضه بتنفذ اللي هي عاوزاه !!
من البداية كده وقالولنا استفتاء وجه الاستفتاء وأنا فاكر كويس والله الاستفتاء كان على ايه كان على الدستور واخدين بالكوا معايا ( الدستووووووووووووور ) ومش أي حاجه تانية وانقسمنا اتنين واحد نعم وواحد لا مع أن أحنا اللي اتنين واحد بس اللي حصل أن الكلام كان على أن نعم من الاسلام ولا من الشيطان حتى لما كتبت مرة مقال بنقد فيه الاخوان المسلمين واحد رد عليه وقال ( أنت أكيد من شلة المنتفعين اللي قالت لا ) وبعد الاستفتاء وبعد اللي حصل بعد الاستفتاء كان نفسي أقابله وأقوله عملتلك ايه نعم ؟
لكن واضح أني كنت مهاجر كندا وأنا مش واخد بالي أصل في حد قالي أن الاستفتاء كان على بقاء المجلس العسكري أو لا ..كان نفسي برضه أقابل نفس الشخص وأسأله أنت أستفتيت على ايه ؟ الدستور ولا حاجه تانيه ؟!
ثم تأتي الأنتخابات بما تشتهي العربيات المتصادمة اللي أحنا راكبينها ونقعد نخبط في بعض ..نخبط في بعض ..بس أنا كشعب والله ما اتبسط والله أن كشعب اتهريت تزوير وتجاوزات و....و ...و
ثم تأتي ساعة الذروة بأه ونقعد نتريق على الأخوان المسلمين والله يا جماعة دمكوا مش خفيف خاااالص ..ضحكت على حاجات زي ( إزاي تخلي الأخوان تحبك ) والشغل ده ..لكن توصل لدرجة المدينة المنورة لأ بايخة ودمها تقيل وبلاش هزار في الكلام ده ..ده كان في ناس أهدرت دم نجيب ساويرس قبلكوا فبلاش كده.
ليبرالية ...إسلامية ...عسكرية يمكن تكون مسميات لكن بتعبر عن رؤي واتجاهات مردديها وبتدل برضه على التخبيط وده لا يمنع وجود عبدالمنعم الشحات وعلياء المهدي وتوفيق عكاشه على الساحة في آن واحد ..سبحان الله يعني !!
كتبت في مقال قبل كده عن الأخوان المسلمين (لعل من أهم فوائد الثورة بالنسبة لي أنها كشفت النقاب عن هوية من كانوا يصرخون ليل نهار من هول ظلم النظام السابق لهم وقمع الحريات ومصادرة الآراء وغياب الديمقراطية وكون ممارستهم للنشاط السياسي أمراً محظور ولكن بمجرد سقوط النظام و انفتاح الساحة السياسية تحولوا لوحوش كاسرة لا تقوى على صد هجماتهم ومصادرتهم لكل من يخالفهم الرأي وعدم اقتناعهم أن هناك شباب يمتلك رؤى مختلفة قد تكون صائبة أن لم تكن في كثير من الأحيان هي الصحيحة ..)
أحنا اتحولنا لكده ...عربيات متصادمة كل واحد فينا راكب واحدة وفرحانين وكل ما نهدا ونبتدي نمشي مع بعض نبدأ رخامة على بعض بس عارف أنت لما هزارك يبقى تقيل شويتين ممكن يبقى غباء ..لأ ده ممكن يبقى سذاجة ..لأ ده ممكن يبقى جهل ..لأ ده ممكن يموت .. لأ ده ممكن يهد بلد ...مصر مش هتتهد !!