الميكروباص اللى يجيلك منه الريح.. متقعدش سواقه عندك واستريح

"الباب اللى يجيلك منه الريح سده واستريح"، هو لسان حال أحد محالات ساندويتشات التيك واى الواقعة بالقرب من ميدان النهضة بمحافظة الجيزة، فبعد أن كان أكثرية زبائنه من سواقين عربيات "الفولكس" التى تستخدم كسرفيس لنقل الركاب، لجأ فى نهاية الأمر إلى تعليق لافتة ورقية كتب عليها بخط واضح "ممنوع جلوس السائقين منعاً للإحراج"، بعد الشكاوى المتعددة من السكان المجاورين له. اللافتة الصغيرة أنقذت محل الساندويتشات من أن يصبح موقف سيارات ميكروباص، بعد أن اعتاد السائقون النزول إلى المحل لتناول الطعام وركن سياراتهم أمام المحل بأعداد كثيرة، يقول "محمود" أحد العاملين بالمحل منذ أكثر من ثلاثة سنوات إحنا وضعنا اليافطة دى بعد المشاكل الكتيرة اللى عملها السواقين لينا فى المحل، لأنهم كانوا بيركنوا عربياتهم قدام المحل، ده غير أنهم كانوا لما بيقعدوا كانوا بيفضلوا يهزروا بشكل مش كويس، وصوتهم كان بيبقى عالى، وفى كتير من السكان اللى فوق فى العمارة اشتكوا منهم، علشان كده قررنا نحط الورقة دى ونمنع أى سواق يقعد عندنا". ويضيف "محمد" وهو عامل آخر موجود بالمحل، "فى سواقين بعد ما شافت الورقة دى بدأت "تستعبط" وتركن عربياتها بعيد وتيجى تشترى، إحنا مش ضد أنهم يشتروا إحنا ضد أنهم يقعدوا يهزروا هزار مش كويس ويقولوا ألفاظ مش كويسة وبعدين المنطقة كلها أهالى وفى ناس كتيرة معجبهاش الحال". على جانب آخر، ينطبق عليهم مثل "مصائب قوم عند قوم فوائد" فبرغم دخول شهر رمضان وبرغم تعود محلات الطعام السريع على الإغلاق فى رمضان إلا أن موقع المحل بجوار ميدان النهضة كان سبب زيادة المبيعات كما يقول "محمود"، "هو المفروض أن إحنا منشتغلش فى رمضان بس فى ناس كتيرة دلوقتى بتيجى من ميدان النهضة تشترى سندوتشان، وده خلى العملية تمشى شوية وخلانا نبيع لأن فى ناس كتيرة هنا مش بتعرف تجيب أكل منين، وفى ناس بتكون رايحة جوه الميدان تأخذ طعام الإفطار معها". هو المفروض أن الجو مريح علشان رمضان، بس الاعتصام الموجود فى ميدان النهضة خلى العملية تشتغل شوية والبيع شغال.. ده يمكن أكتر من الأيام العادية علشان الأحداث الموجودة فى المنطقة".