مذكرات الشاويش همام :ازواج الست ريري

الساعة عدت 12 .. والقسم فضى نهائياً .. البيه رئيس المباحث والمعاونين روحوا بعد ما خلصوا خدمة مباراة الزمالك والوداد اللى اسعد فيها الفريق الأبيض جمهوره .
الشاويش همام لقى نفسه فاضى ومزاجه عالى , قام دور على الراديو اللى محتفظ به من 20 سنة وجاب اذاعة الأغانى وعمل شاى بالنعناع .. وقعد يفتكر ايام زمان , وسرح بخياله قبل ما يتزوج ام اسماعيل اللى مش عارف هو اتزوجها ليه .
لا حبها ولا غيره كل اللى فاكره انه صحى من النوم وجدها نايمة جنبه فى السرير .
وسط سرحان الشاويش همام سمع هيصة وخناقة فى القسم اثنين رجالة ومعهم ست حلوة كل واحد بيزعق بيقول انها مراته .
اتعكر مزاج الشاويش همام وشخط فيهم وقال سكوت .. بص على الست عجبه لبسها كانت شبه عريانة وبص على الإثنين رجاله وقال لهم عاوز اعرف الحكية .
قام واحد منهم اتكلم بسرعة .. وقال له يا حضرة الشاويش الست دى مراتى تزوجت منها عرفياً من 7 سنين فى الإسكندرية .. وبعد 90 يوم بالتمام والكمال هربت منى وسرقت الف جنيه .. وبالصدفة كان معى موضوع فى مصر .. واحد صاحبى عزمنى على كباريه درجة تالتة .. سبحان الله انا كنت رافض وصاحبى اخذنى بالعافية .. بعد نص ساعة من دخولى للكباريه شفت ست بترقص على المسرح .. ركزت فيها وجدتها الست اللى سرقتنى وهربت منى .
قمت طالع على المسرح علشان اقبض عليها واجيبها هنا .. اتلموا علىّ وقال انها زوجة طبال الفرقة .. وانا قررت اجى هنا علشان الحكومة تجيب لى حقى .
بص الشاويش همام لصاحب الكلام وقال له معك ما يثبت انها كانت مراتك .. لسانه تقل فى الكلام وقال ادور على الورقة لما ارجع الإسكندرية .. ضحك الشاويش قال لما تلقى الورقة تعالى هنا واحنا ناخد عنوان الست وعرفنا هى متزوجة من مين.
وبص الشاويش على الطبال وقال له وانت متزوج منها رسمى ولا عرفى .. رد عليه رسمى يا حضرة الشاويش وبطاقتها مدون فيها انها مراتى .
كلام الراجل الأولانى سد نفس الشاويش من الراقصة الحلوة .. وبص عليها وزعق فيها لو كلامه طلع صح يبقى مصيبتك كبيرة اتنين يا مفترية .
والدمعة سبقت كلام الراقصة ريرى التى بدأت تحكى قائلة :
يا حضرة الشاويش كلام الراجل دا صح .. انا فعلاً هربت منه وسرقت الف جنيه .. بس عارف ليه .. البيه كان عاوزنى جارية لأصحابه .. كل يوم حفلة فى الشقة وعاوزنى ارقص لهم عريانه علشان لزوم الإنبساط .
انا هربت منه لما واحد صاحبه حاول يغتصبنى وهو لم يعمل حاجة .. شوف يا حضرة الشاويش .. صحيح لبسى عريان وجسمى متاح للكل يشوفو بس انا ست شريفة .. عمرى ما عملت الغلط هو السبب فى اننى اعمل راقصة بعد هروبى نزلت مصر ولكن ولاد الحلال عرفوا يستغلوا ظروفى وتزوجت الطبال اهوه ضل راجل ولا ضل حيطة .. وفى النهاية هو سند وعكاز .
وانا مش زعلانة من كلام الراجل اللى قالوا علىّ زعلانة على نفسى لأننى لم اسمع كلام امى .. آه لو كنت معرفتش سامية اللى بوظت اخلاقى كان زمانى ست بيت محترمه ومعايا عيال فى المدارس .
يا حضرة الشاويش الدنيا لم تعد تفرق معايا انا تحت امر الحكومة .. مش مبسوطة من نفسي والناس كلها طمعانة فى لحم جسمى .. يا شاويش انا اضحك آه .. لكن قلبى مليان حزن و كلام كتير خليه فى القلب يجرح بدل ما يطلع بره يدبح .
انا تحت امر الحكومة جايز الحبس رحمة لي . افضل من العيشة مع ناس قلوبها زي الديابه .