مذكرات عمده

بعد سفر ضياء الي مصر المحروسة العمدةالحلوانى كل ما يفتكره دمعته تفط من عينه، فهو احب اولاده وكان كل يوم يقرأ له الجرنال وعارف جناب العمدة بيحب ايه .
وجناب العمدة مثقف عارف كتاب الاعمدة فى الصحف واحد واحد و بيحب يقرأالاخبار من 40 سنه وكان يوم السبت عنده عيد علشان الموقف السياسى لابراهيم سعده اللى كان بيقول عنه صحفى حر راجل لا يهزه ريح .. يخاف بس من ربنا .
بعد سفر ضياء .. قراءة الجرايد اصبحت مهمة هلال اللى بيغلب ابوه كل يوم .. اتحط الشاى بالنعناع امام العمده وقعد هلال بعيد عن ابوه علشان ما يشم رائحة السجائر اللى فايحه من هدومه .
هلال عاوز يغيظ جناب العمدة بدأ بقراءة اخبار هايفة.. ساب السياسه و اخبار الحكومة و قعد يقرا له فى الكورة.
اول خبر سمعه العمدةمن بق هلال كان عن ميدو المقاصة و اللى كان عنوانه "الزمالك يرفع سعر اللاعب الى 17 مليون جنيه .. شخط العمدة فى هلال .. قال له ايه حكاية ميدو .. قال هلال ده لاعب فى المقاصه الاهلى عاوز يشترىه .. و النادى بتاعه طلب 17 مليون جنيه، خشم العمدة بدأ يجيب كلام مش مفهوم 17 مليون فى لاعب ليه رجله ذهب ولا ماس هو ميدو دا صنع الطياره يا ولدى .
رد هلال لاجناب يا عمدة اللاعب كويس .. والاهلى عاوزه بعد ما باع ايفونا ب 80 مليون .. سكت العمدة و بص على هلال .
يابنى انت مش بتعرف تلعب كوره و سبت المدرسة كام مرة علشان تلعب كوره على الزراعيه .. وسقطت فى الثانويه 3 مرات بسبب غرام الكورة .. يا ولدى روح الاهلى يمكن يشتريك بكام مليون ناخدهم و نطلع الجبل نزرع لنا20 فدان ..
رد هلال وقال يا ابويا انا لاعب هاوى اخرتى العب حافى على الزراعية .. ميدو ده بيلعب كوره وعمره 4 سنين .
وزعل العمدة و زعق فى هلال و قال كفاية انا عمدة ابن عمدة من100 سنه .. عمرنا ما سمعنا عن الملايين .. علشان اعلم ولدى فى جامعة الاكابر بعت 3 قراريط .. ياريت خلفت عيل زى ميدو .. اهو كان هيجيب كام مليون .
ولدى طلعت المدرس عاوز مصروف شهرى رغم انه متوظف بس هو عاوزه علشان يبقى العمدة الصغير .
وهلال كل فلوسه مصروفة على الكمبيوتر و الانترنت .. رحمتك يا رب .