عصير القلم

حد فاهم حاجة ؟!

موضوع درس اليوم بعنوان »اذا الشعب يوما اراد الحياة فلابد ان يستجيب القدر ولابد لليل ان ينجلي ولابد للقيد ان ينكسر«.
والشعب المصري اراد الحياة والحرية .. واستجاب القدر .. وأطاح المصريون بالنظام الطاغي المباركي.. ولكن الليل لم ينجلي والقيد لم ينكسر..!
لماذا لم ينجلي الليل ولماذا لم ينكسر القيد ؟!..
أكيد فيه حاجة غلط .
اللي عارف فين الغلط يرفع ايده..
يا تري الغلط في الثورة اللي افتقدت للقائد.. ولا الغلط في الثواراللي سلموا ثورتهم بدون قيد اوشرط وافترضوا حسن النية في الجميع .. ولا في الاحزاب والتيارات اللي اعتبروها كعكة وكل واحد عايز حته..؟!
ياتري الغلط في حكومة الثورة اللي عمرها ماحست انها في ثورة .. ولا فكرت تحقق مطالب الثورة..
يا تري الغلط في اللي حاكم الثواروساب قتلة الثوار..
حد فاهم حاجة ؟!
اللي فاهم يجاوبني .. يعني ايه الشرطة تقتل 30 ثائر في 3 ايام وما تقتلش بلطجي واحد في 10 شهور..
يعني ايه فلول الوطني اللي افسدوا البلد 30 سنة ينزلوا الانتخابات وشباب الثورة اللي طهروا البلد قاعدين بيتفرجوا..
يعني ايه القناصة ينشنوا علي العيون بالذات .. يا تري عايزين يعموا الثوار علشان يفضلوا يستعمونا ؟!
روح الشهيد بتسأل بأي ذنب قتلت..
روح الشهيد بتصرخ بأي حق سلبت..
روح الشهيد بتقول .. ليه من اهلي خدوني ومن حبايبي حرموني ..؟
انا كنت واد جدع وبحب بلدي.. لاكنت طمعان في منصب ولا عايز أي مكسب..
خرجت من بيتي بقول سلميه سلميه .. ردوا عليا بنار حامية ..
انا مش وفدي ولا اخوان.. انا مش سلفي ولا علمان .. انا مصري والسلام .
انا كنت عايز عيش وحرية وكرامه وعدالة اجتماعية ما كنتش طالب حقيبة وزارية..
انا كنت عايز بكرة اجمل لكل الناس اللي حواليه .. بس هم استكتروه عليا..!
انا مش زعلان ولا ندمان..انا بس حيران..
الثورة نجحت ولا لأ ؟!
لو نجحت يبقي حد يفهمني اللي بيحصل ده بيحصل ليه.. ولو ما نجحتش يبقي العادلي قاعد في السجن ليه ؟!
انا دمي راح بتمن ولا راح هدر ؟!
انا فعلا شهيد ولا ميت قضاء وقدر ؟!
الحصة خلصت وانتهي الدرس .. اقفلوا الكشاكيل ولموا الكراريس.
واللي مافهمشي يستني الحصة الجاية أو..الثورة الجاية.