عصير القلم

يعني إيه ثورة ؟

ثورة يعني ناس جابت آخرها ونهارها بقي زي ليلها..
يعني ايه ثورة؟
ثورة يعني امبارح زي النهارده وبكره زي بعده.. وشباب مفيش امل عنده .
يعني ايه ثورة ؟
ثورة يعني ظالم وصل للنهاية وشعب بيقول كفاية.
ثورة يعني نهدم كل القديم ونبني من جديد .. ونضرب علي دماغ كل فاسد بيد من حديد.
ثورة يعني عيش وحرية وكرامة وعدالة اجتماعية.
عيش علشان نعيش .. وحرية علشان نتنفس .. وكرامة وعدالة علشان نعرف نعيش ونتنفس.
ثورة يعني تقدرتعلم ابنك وتجوز بنتك .. ثورة يعني تقدر تقول كل اللي في نفسك.
ثورة يعني تلاقي سرير في مستشفي لما تتعب.. وابنك يلاقي نادي لما يحب يلعب.
عارفين يعني إيه ثورة ؟
ثورة يعني نور ونار .. نور ينور ضلمتنا ونار تحرق اللي يقف في سكتنا..
عارفين يعني ايه ثورة ؟
ثورة يعني الشعب يحكم نفسه بنفسه .. ثورة يعني الحاكم لما يحكمنا لازم يحس بهمومنا..
اللي مش عارفين يعني ايه ثورة..أقول لهم انا يعني ايه ثورة.
اللي عملناه يوم 25 ينايركانت ثورة .. كانت أعظم ثورة..
ثورة اتعلم منها العالم كله يعني ايه ناس بتطالب بحقوقها..يعني ايه ناس اطاحت بالنظام اللي كان خانقها..
ثورة يعني ناس قعدوا في الشارع 18 يوم ..من غير ما حتي يغيروا الهدوم..
ثورة يعني ناس خلعوا مسمار راشق في قلبها من 30 سنة.. مسمار كان بيقول تقف القلوب وما اتخلعش أنا..
ثورة عايزين يسرقوها مننا .. عندهم حق .. علشان عمرهم ما حسوا بهمنا وما يعرفوش اننا عملناها بدمنا..
ثورة عايزين يخطفوها مننا وما يعرفوش انها كل حلمنا.. والغلطة مش منهم الغلطة من عندنا.
غلطتنا اننا قطعنا راس الافعي وسيبنا ديلها يلعب ويلاعبنا.
غلطتنا اننا مشينا بالقانون مع ناس ما تعرفش القانون.
غلطتنا اننا مشينا صح قوي مع ناس ما يخافوش غير من القوي
يا خوفي ينجحوا وألاقي مبارك بيحكمنا والعادلي بيحاكمنا