محكمة القلم !

اللى حضرتك حاتقراه دلوقتى مش مقال بالمعنى المعروف .. ممكن تسميه فضفضة .. ممكن تعتبره (حالة) بس ارجوك ماتعتبروش مقال لانى مش عايز التزم بشروط المقال .. مش حاقعد ادور على بداية ونهاية ومش حاكتب لغة عربية فصحى .. ممكن تتخيل ان انا وانت قاعدين مع بعض على القهوة وبنرغى .. بنهرتل .. بنعمل اى حاجة مش مفيدة ..
- انا حاطلب قهوة سادة – على فكرة انا باشربها كده من زمان –
- ها .. شيشتك تمام ؟
بص بقى ياسيدى .. انا قافش شوية .. مش مبسوط .. حاسس ان توابع الثورة واخدانا فى سكة مش حلوة .. استنى بس قبل ما تبرطم وتبتدى تقول ثورة مضادة وكلام من ده .. الثورة فى حد ذاتها زى الفل .. واللى بيقروا مقالاتى فى مجلة الشباب يجى من 3 سنين فاتوا اكيد عارفين انى مابزايدش .. وانى كانت منتهى املى فى الشغلانة دى ان الناس تفهم يعنى ايه (ان الله لايغير ما بقوم حتى يغيروا ما بانفسهم ) وبالتالى انا معنديش مشكلة .. المشكلة بقى فى الناس اللى على راسهم بطحة .. الناس اللى كانوا بيبوسوا جزم النظام السابق طول الوقت وعينى عينك وعلى عينك يا تاجر .. وبعدين فجأة بقوا ثوار احرار .. فجأة بقوا شرفا !!
طيب بامارة ايه ؟
يعنى ايه النهارده واحد صحفى ولا رئيس تحرير ولا رئيس مراجيح مولد النبى حتى يكون عنده ارشيف اسود ومنيل بستين نيلة .. وبعدين يكتب مقالتين بعد الثورة علشان يغسل سمعته ؟
يعنى هو فاهم انه بيتعامل مع ناس اغبياء ؟
هو فاكر ان اللى بيقرا ده مفيش فى دماغه كارت ميمورى ؟
ايه الرزالة دى ؟
- عايز ولعه ؟
طبعا انت عارف اكتر منى مين الافندية اللى باتكلم عنهم دول .. وعلشان كده انا بقى عندى فكرة بنت لذينة .. تعالوا نعمل محكمة زى محكمة الثورة بتاعة يوليو 52 بس نسميها محكمة القلم .. ونجيب الارشيف بتاع كل الناس اللى كانت بتكتب مقالات بتمجد فيها رموز الفساد بتاع النظام السابق .. ونختار كل يوم واحد من الكتاب دول وننشر مقالين تلاتة من اللى كان بيهيس فيهم .. وانتو تحكموا عليه بحكم من اربعة : اعدام ( يعنى ما يكتبش تانى خالص ) – مؤبد ( يعنى يتمنع من الكتابة 25 سنة ) – لفت نظر (يعنى يتمنع من الكتابة للمدة اللى تحددوها ) – او براءة ..
ويبقى مطلوب منك يا معلم انك تبعت دلوقتى تقول الاسماء اللى انت عايز تشوفها ورا قضبان محكمة القلم .. واحنا نجيب المقالات من الارشيف وننشرها .. وبعدين انت تقراها وتحكم على صاحبها .. ايه رايك ؟
- تشرب حاجة تانى والا اطلب الحساب ؟
- طيب تحب تبتدى بمين ؟

محمد عبد الله