البنت التي تلاعب الاولاد علي الارض ياسمين تراوغ اللاعبين وتتحدي الرجال

تحقيقات

البنت زي الولد مهياش كمالة عدد..كلمات كتبها الشاعر الكبير الراحل صلاح جاهين و غنتها الراحلة سعاد حسني تعلن فيها المساواه بين الولد والبنت في كل شيء حتي في احتراف الرياضة لكن الامر تعدي احتراف رياضة الاندية ووصل حتي النزول للساحات الرياضية..يعني لو في يوم بتلعب فيه انت واصحابك ومأجرين أرض ساعة ولقيت 10 بنات داخلين عليك وبيقولوا لك ياله ياكابتن عشان احنا الماتش الجاي متتخضش ... أو صادف يوم ولاقيت بنت جميلة ومحجبة بتقولك تلعب علي الارض ياكابتن متفكرش وتلعبها عشان هتغلبك لأنها أحرف من ميسي ميه مره ..وعموما هي صورها موجوده في الموضوع عشان تحفظ شكلها وما تحاولش تخسر نفسك امام مهاراتها...ده باختصار اللي عملته ياسمين السيد أول مدربة كرة قدم في مصر خارج النوادي..ياسمين طالبة في كلية هندسة يعني المعني الحقيقي لجمله لعب وفن وهندسةت.. إيه أسباب اختيارها كره القدم ؟..ايه المشاكل التي تواجهها هي واصدقائها في ممارسة كرة القدم؟..وهل في امل في وجود فريق نسائي قوي يخرج من كرة الشارع والهواة؟..اشياء كثيره في حوار ميسي البنات ياسمين السيد مع اخبار الرياضة
لماذا كره القدم وليه مش اي لعبه تانيه؟
الموضوع بيتعلق بالهواية فانا باحب كرة القدم منذ الطفولة وكنت بالعب في الشارع مع الولاد
بنت مع ولاد مش صعبة شوية خاصة ان الولاد بتلعب بقوة؟
بص أنا بنت بره الملعب لكن في الملعب مع الولاد بلعب بغباوه واجمد منهم
في مضايقات كتير اكيد بتتعرضي ليها صح؟
اكيد طبعا لان الموضوع غريب علي المجتمع بنت بتلعب في ملاعب الولاد الساحات الكرويه المخصصة للهواة وليس للمحترفين..فبسمع بقا معاكسات بالجملة امثال»‬ شوف البنت المسترجلة دي »..ياواااد يالاعيب
امتي بقا قررتي تتدربي البنات عشان يمارسوا كره القدم ؟
هو الموضوع بدأ لاني شوفت بنات كتير بتحب كره القدم ولكن معندهاش خلفيه ..مجرد انها بتحب لعب الكرة وبالتاليت معندهاش فرصه انها تنضم لنادي لان اي نادي بيعمل اختبارات قبل ما يقبل اي بنت ..فقررت اجمع البنات اللي بتحب الكرة وادربهم في اي مكان ..وبدأنا نلعب مع بعض مباريات وديه وبدأ العدد يزداد
حوالي كم عدد البنات اللي معاكي؟
العدد مش ثابت متغيير حسب الاجازات يعني أقدر اقول اني وصلت ل30 بنت ..وبفكر جديا ان احنا نعمل دوره رمضانيه للبنات ..ولكن يواجهني بعض الصعوبات في تنسيق المواعيد مع البنات
السؤال المهم في أمل في حد فيهم؟
طبعا لان في استجابه قويه من بنات كتير قوي واحرف من اي ولاد
طيب عايزين نشرح للناس معني كلمه مدربه خارج النادي ؟
انا بدرب البنات خارج النادي وبأعلمهم اساسيات الكرة وبأهلهم انهم يعرفوا يلعبوا الكرةتبس كده ده اللي بعمله بالظبط
تفتكري أول مرة لعبتي كرة فيها ؟
أول مرة كانت في ابتدائي كنت بألعب مع أقاربي والجيران في الشارع ، ومن بعدها اتجهت الي نادي الطيران
ايه الهدف الأساسي انك تدربي وتلعبي كرة قدم ؟
نفسي البنات في مصر تلعب كرة قدم ، ونغير فكرة ان كرة القدم للبنت عيب .
مين مثلك الأعلي في كرة القدم المحلية والعالمية ؟ وبتشجعي نادي ايه ؟
المحلية ، طبعا كابتن »‬أبو تريكة» ، العالمية »‬ميسي» ، وبشجع النادي الأهلي .
هواياتك ونفسك في ايه في المستقبل ؟
انا هواياتي بحب كل الرياضة وبحب امارس الرياضة ونفسي ابقي مشهورة ويبقي ليا اسم في مجالي .
في انتظار المسئولين
تنظر ياسمين واصدقاؤها نظره من المسئولين عن كره القدم النسائية في مصر لاختيار بعض المواهب وضمها للمنتخبات وليس شرطا الذهاب للاندية لان الشوارع بها العديد من المواهب التي تنتظر الفرصه
مازالت ياسمين واصدقاؤها يكرهون نظره المجتمع لهم حيث وصفت ياسمين المجتمع بأنه رجعي في نظرته للبنات الذين يمارسون كره القدم وان علي الاعلام محاولة تغيير تلك الفكره من أجل مستقبل أفضل لكرة النسائية في مصر ..حيث اكدت ياسمين أن تلك النظرة لكرة القدم فقط ولا تعرف السبب خاصة وان هناك بنات تمارس السلة والطائرة ولا تجد نفس الانتقاد.