‮ ‬‮ ‬ر وكا والملك‮ ‬‮

اللي يسأل مايتوهش‮!‬

في ختام جولة جلالته لتفقد الوحدة الصحية بعزبة الميتين،‮ ‬قال روكا الحرامي للملك رمسيس الثاني‮: ‬شحيبر تمرجي الوحدة مابيتأخرش عن الفلاح‮.. ‬الوزارة قالت له الدولة مسئولة عن علاج ولادها ببلاش‮.. ‬ومهما يكلفوها،‮ ‬ومستعدة تصرف علي الواحد منهم من جنيه لشلن وانت نازل‮. ‬عشان كده سيادتك بيعمل لهم التحاليل ببلاش والدوا ببلاش والعمليات ببلاش‮. ‬ويوماتي يمضي كبشة تصاريح دفن‮.. ‬وبرضة ببلاش‮. ‬بس سيادتك ملك قديم وعارف أن العلم بحره مالوش أرار‮. ‬والطب لسه ما وصلش لعلاج بلاوي متلتلة‮. ‬يعني مثلا دمامل‮. ‬امساك،‮ ‬تعويرة‮. ‬وجع السنان والودان‮. ‬حرقان فم المعدة،‮ ‬كالو في الصوابع‮.. ‬والتهاب الضوافر والعياذ بالله‮. ‬دي كلها امراض مالهاش علاج في الوحدة‮.. ‬اصلها مستعفية سيادتك‮ .‬
‮ ‬قاطعه الشيخ‮ ‬غريب‮ : ‬قصدك مستعصية ياسيد المعلمين‮ !‬
ومضي روكا يقول للملك‮ : ‬الأمراض دي لما تكلبش في جتة الفلاح اجارك الله‮.‬يِفضل يتعالج علي إيد شحيبر وياخد من الدوا الحلو بتاعه لحد ما ربنا يكرمه ويفلسع‮.‬
قال الملك لروكا‮: ‬بعد كل ما شاهدته اقول ان الخدمة الصحية في عزبة الميتين سيئة للغاية،‮ ‬ولابد من طبيب يتولي العمل بدلا من شحيبر الوغد الجاهل‮.. ‬إن حياة أحفادي في خطر أيها اللص‮.‬
قال روكا‮: ‬ياعم رمسيس ماتعملش من الحبة قبة‮. ‬وجود شحيبر مصلحة للبلد والفلاحين‮. ‬أصل الوزارة لما بتبعت دكتور لأي وحدة صحية لازم يكون خريج جديد لانج يتعلم الطب في الناس وياطابت يا اتنين عُور‮. ‬انما شحيبر خبرة سيادتك‮. ‬عشر سنين شيخ‮ ‬غفر علي سِن ورُمح عند اكبر عمدة في وجه بحري وفاهم الكُفت‮: ‬ده فلته وشرف أمي‮ . ‬مافيش تمرجي‮ ‬غيره اخترع دوا‮. ‬ولا تمرجي قبله عمل عملية لعيان‮.‬
قال الملك‮: ‬من العار ان يقوم شخص أمي بعمل جراحة لمريض من احفادي‮.‬
رد روكا‮: ‬ياعم رمسيس قول ياباسط‮. ‬العلم في الراس مش في الكُراس‮. ‬وشحيبر راسه متكلفة ولسانه حلو وقلبه زي اللبن الحليب‮. ‬وكمان معاه بدل الكارنيه تلاتة،‮ ‬وإيده خفيفة تقولش حرير‮. ‬وكان شغال عند عمدة صالح حَج بيت الله مرتين‮.‬
قاطعه الشيخ‮: ‬3‮ ‬يامعلم‮ !‬
قال روكا ازاي بعد ده كله ما يعملش عمليات ياسيادة الملك ؟ وهي العملية ايه‮ ‬غير بخة بنج ومطوة قرن‮ ‬غزال تتسخن علي نار السبرتاية لحد ما توهوج،‮ ‬واول ما يفتح بطن العيان ح يشوف بنفسه كل حاجة بتلعب قدامه‮. ‬المصارين والكبد والكلاوي والطحال‮.. ‬وخير ربنا كله‮.. ‬والحاجة اللي مايعرفهاش مش عيب لما يسأل‮. ‬أهل العيان وصحابه وجيرانه وقرايبه كلهم ملمومين حواليه‮. ‬إذا سأل عَيل في اعدادي فين القلب مش ح يتأخر‮.. ‬ح يشاور ويقول له أهه ياعم شحيبر‮.‬
قال الشيخ‮: ‬واللي يسأل مايتوهش‮ !‬
سأله الملك مستنكرا‮: ‬وكيف يمكن لهذا الوغد الجاهل أن يقوم بنقل دم لمريض اثناء الجراحة ؟
أجاب روكا:بالقُمع سيادتك‮ .. ‬وعنده بدل الخرطوم تلاتة‮.‬
قال الشيخ‮ : ‬4‮ ‬ياسيد المعلمين‮ !‬
صاح الملك‮: ‬أقسم بآمون أن هذا الجربان لايملك جهازا للاطمئنان علي سلامة الدم من التلوث‮.‬
قال روكا‮: ‬تحليل الدم مالوش لزوم ياعم رمسيس عشان مصلحة العيان‮. ‬يعني مثلا اذا كان الدم عَمران بست سبع امراض يبقي ربنا استجاب لدعاه صُبح ومسا ويابخته بالجنة ونعيمها‮. ‬واذا كان الدم نضيف سيادتك يبقي ياويله وياظلام ليله‮. ‬ح يخف ويعيش ياولداه ويشرب المُر من فوايد بنك التسليف وغلاسة الدودة ومشاكل الري وغلا التقاوي والكيماوي والسكر والشاي والرز والمكرونة وازازة الزيت،‮ ‬ويلف حوالين نفسه دوخيني يالمونة زي التور المربوط في ساقية لحد ما ربنا يكرمه بفسفوسة تحت باطه ويروح يعالجها في الوحدة الصحية‮.‬
قال الشيخ‮: ‬ومبروك عليه الجنة‮ !‬