فركش

**خرج علينا بعض الجهلاء والمدعين بكرسى فى الكلوب قال إيه جوائز مصر بمهرجان الإعلام العربى مش من حقها ومجاملة من لجان التحكيم.. والنبى مش كلام يحرق الدم..
طيب حتى لو كانت كده فرضاً.. مستكترين علينا الفرحة حتى ولو مضروبة.. لموا نفسكم شوية وشوفوا بتوع الخليج والأردن والمغرب لما بيعملوا مهرجان بتعريفة بيهيصوا عشانه إزاى.. جاتكم خيبه..!!
** خير.. لأول مرة - منذ بدء مهرجان الإذاعة والتليفزيون «سابقاً» الإعلام العربى حالياً - مانشوفش قطاع الإنتاج مايصممش ولا ينفذ حفلى الافتتاح و الختام..!!.. وهل تم خفض المصاريف بإسناد الحفلين لشركة خاصة؟ ويا ترى وفرتم قد إيه !! فيه حد هايقولنا واللا برضه فى الطناش..!!
** ياما حذرت هنا وليد دعبس من الوقوع فى حفر إعلامية لقناته.. وياما قلت لمدحت شلبى صاحب الألقاب الحلمنتيشى. شلبوكه..وشلابينو..و..و.. خللى بالك.. ولكن كفانا الله شر الغرور قرأ نكتة «لامؤاخذه» مش ولابد ..وبعدين يا عالم لسه هانسمع إيه تانى..!
**..وبمناسبة ما سبق وبالمرة ..اسأل الكابتن الكبير مصطفى تونس - آسف أقصد يونس - : ليه بقيت بتكره الأهلى كده..أكيد فيه سر..!!
** حلو قوى الكلام إللى أحمد السقا قاله عن مشاركة أحمد عز بطولة فيلم «مصلحة».. ناصح جداً..لأن أحمد عز نجمه فى السما ..وهايسند المسألة معاه.. وياريت نرجع نشوف أفلام فريد شوقى ومحمود المليجى .. ونور الشريف وحسين فهمى..وعادل إمام!
** فرحت بفوز نادية الجندى بجائزة أحسن ممثلة بمهرجان الإعلام العربى لسبب أساسى أنها أكثرممثلة إنضربت فوق وتحت وفى الجنب والضهر وهى بتصور «نازلى».. يقوم ربنا يجازيها صح عشان إللى ييجى
على «الولايا» مايكسبش ..ونادية»وليه» بس زى القمر..!!
** محمود سعد: مهما كنت بتعمل حسنات.. افتكر أكبر ثواب بتاخده عن فقرة الشيخ خالد الجندى ود.سعد الهلالى.. ويا سلام لو دى فكرتك.. يبقى الثواب بالزكيبة فى ميزانك..!!
** أسامة الشيخ: يا مولانا فين البرامج الدينية.. واضح إننا مش محتاجينها .. واللا عشان مابتجبش إعلانات !!
**تصوروا قنوات الأفلام الخاصة مليانه إعلانات - اللهم لا حسد - وكلما شاهدت نايل سينما يصعب علىَّ فراغ شاشتها من الإعلانات.. طبعاً ماهى من غير رئيس متفرغ لها.
diaadandash@yahoo.com