الركن الهادي

السلام عليكم ورحمة الله وبركاته.. وكل انتخابات برلمانية وأنتم طيبون.. وحنشوف المجلس الجديد هيعمل إيه.. والنواب اللي انتخبتوهم حيفتكروكم ويردولكم الجميل.. وإلا زي كل مرة.
فيه موضوع محيرني من مدة عن الرسايل اللي بتوصلني.. وكل أسبوع أقول أكتب فيه وبعدين تيجي حاجة تخليني أأجله.
عندي سؤال مثلاً:
* ليه من بين كل مراكز ومدن محافظة كاملة وكبيرة زي بني سويف.. مركز واحد بس هو مركز سمسطا. هو اللي بتيجي منه 99% من رسائل قراء بني سويف للصفحة والركن؟!
اشمعني سمسطا؟! وفين قراء الفشن مثلاً وببا والواسطي ومركز ناصر.. بل ومدينة بني سويف نفسها؟!
هل "الجمهورية" مبتوصلش المناطق دي؟! هل بتوصل بس الناس هناك مبتقرهاش.. هل معندهمش مشاكل يبعتوها ولا تعليقات علي أي أحداث يشاركوا بيها؟! هل مفيهاش مثقفين وطلبة جامعات ولاد وبنات بيحلموا زي غيرهم في سمسطا بالمستقبل أو بيحبوا يشاركوا ويحطوا أسامي المراكز والمدن بتاعتهم علي خريطة الصحافة المصرية.
الواضح لحد دلوقتي أن سمسطا وأهلها يستحقون التحية فعلاً.. لأنهم إيجابيون وبيقولوا رأيهم في كل شيء.. ونجحوا في أنهم يخلوا اسم سمسطا أشهر من نار علي علم.
بس نفسي حد يفسر لي غياب بقية مراكز ومدن بني سويف وأهلها عن الصورة.
* نفس السؤال عندي بالنسبة لمحافظة سوهاج..
صحيح بتيجي رسايل من مدينة سوهاج نفسها ومن بعض المدن التانية.. لكن عدد المراسلين فيها قليل..
المركز الوحيد اللي مكتسح المحافظة كلها في عدد القراء والقارئات اللي بيراسلوا الصفحة هو.. طهطا.
فين قراء جرجا وطما وأخميم وغيرها من مراكز المحافظة؟! بح.
يا تري معندهمش مشاكل؟! يا تري مالهمش رأي في أي حاجة؟! يا تري بيتكسفوا اساميهم أو صورهم تنزل في الجرايد مع إننا بننشرها مجاناً؟! ده حتي من الحاجات الحلوة في سوهاج وقرائها.. إن بنت واحدة من طهطا هي مروة محمد العارف هي دلوقتي اللي بتتزعم مع زميلتها سمر محمد نصار الإسكندرانية القارئات البنات علي مستوي مصر كلها.
* نفس السؤال بالنسبة للدقهلية مع أنها عاصمة المثقفين في وجه بحري كله. والمحافظة رقم واحد في عدد قراء الجمهورية اللي بيراسلونا..
الدقهلية بالنسبة لرسائل القراء والقارئات عبارة عن مدينة المنصورة نفسها. ومركز المطرية ومركز المنزلة.. وإلي حد ما.. نبروه.
أما طلخا مثلاً وأجا. ومنية النصر. وتمي الأمديد وغيرها وغيرها.. فلا وجود لها علي الخريطة.. برضه إيه السبب؟!
يا رب الموضوع ده يشغل قراء المحافظات دي وغيرها. ويحاولوا يكتبولي تفسيرهم للظاهرة دي.. عشان لو فيه أي مشكلة عند المراكز والمدن الغايبة دي نحاول نحلها.
** ومع مشاغبات الأسبوع:
* من طنطا. كتب مجدي محمد التميمي المدير العام بالضرائب العقارية يقول:
في ركن الخميس اللي فات. كتبت إحدي الصديقات عن حكم المحكمة الإدارية بعدم جواز ارتداء المرأة للملابس الضيقة والشفافة والقصيرة.. وأنت عارضت الحكم ده.. إن كان صدر أصلاً.. بل وقلت إنك ضد إنها تلبس من أصله.. وسجلت بعض أسبابك..
وأنا شايف. منعاً للبلبلة. إنه يتم تشكيل لجنة من المستشار جودت "الملط" والمخرج رياض "العريان" تعقد جلساتها في جزيرة "مالطة" للفصل بين الأعضاء.
** المحرر: إحنا هدفنا تحقيق "اتصال الأعضاء".. موش الفصل بينها.
* أتمني أن أنال شرف وقبول صداقتي في الركن الهادي ودي أولي رسائلي:
مبقناش عارفين الصالح من الطالح.. والفالح اللي دفع فلوسه.. وبفلوسه الناس تبوسه.. ومن غيرها تدوسه.. إحنا اللي ساعدنا علي الكوسة والهيصة.. والبلطجة والزيطة.. وهنام ونقوم برضه علي هموم.. وأتمني من الله أن الخير يدوم.
حسام العشماوي
هليه - ببا - بني سويف
** المحرر: تصدق إن دي أول رسالة توصل من "ببا" من سنين.. أهلاً بك.. ويارب تكون أنت اللي تشجع بقية شباب وشابات ببا يشاركوا معانا.
* من دار السلام بسوهاج. كتب حمادة عجور يقول: أثبتت دراسة علمية أجريت مؤخراً أن "الرجل الغضبان" هو الأكثر إنتاجاً.. بس مقالوش في إيه بالضبط.
** المحرر: في 25 ثانية.
* ماذا أنت فاعل وكيف تتخيل مسيرة حياتك إذا ما حصلت زوجتك علي مقعد في البرلمان تحت القبة؟
عبدالكريم مكي
العطواني - أسوان
** المحرر: الراجل الحقيقي متفرقش معاه.. لأنه مكانه فوق.. موش تحتها.
* سمر محمد نصار - بكالوريوس تجارة - الإسكندرية كتبت تقول:
قال رئيس محكمة الاستئناف أن شعبية الحزب الوطني تفوقت علي شعبية الأنبياء.. بالله عليك ده كلام يتقال؟؟؟
** المحرر: سيبك من ده.. فين أجمل عيون وأحلي ابتسامة وأسخن مشاغبات.. وإلا احنا في البيات الشتوي؟!
ومن طهطا - سوهاج. كتبت مروة محمد العارف تقول:
انتهت انتخابات مجلس الشعب 2010 بحلوها ومرها وتزويرها وكالعادة نجح الذي لا يستحق.. بلا انتخابات بلا..... ده كله مش مهم. المهم: هو ابتداء مهرجان القاهرة السينمائي الدولي 2010 هو ده المهم. قصاقيص الفساتين السواريه بألوانها الجميلة الباهرة والأهم الذين يرتدون هذه القصاقيص في جو بارد عندنا وشديد الحرارة عندهم.
وربنا يزيد من سخونة الانتخابات والأهم يزيد من سخونة المهرجانات..!!
**المحرر: أنت برضة بتتكلمي عن القصاقيص.. موش لما تردي علي سؤالي الأول؟!