فركش

محدش.. هايلوي.. دراعنا

** إللي مش هايفهم رسائل الرئيس السيسي التي يوجهها كل فترة.. يشوفله بلد تانية يعيش فيها.. لأنه لو فهم الرسايل دي هايعرف إيه اللي بيحصل حوالينا وإيه اللي بيدبروه لينا.. والحكاية بساطة أن مصر أصبحت في مرمي الدول أصحاب المصالح التي لا تتحقق بسبب مصر وقوتها وشعبها وجيشها ورئيسها.. كل ما الرئيس السيسي يفتتح مشروعاً تنموياً عملاقاً تلاقي المتربصين بيولعوا.. ويبدأوا في تدبير المكائد.. وربنا بيحفظ مصر منهم.. ولو رجعنا وشوفنا الريس من كام يوم وهو قاعد علي قناة السويس وبيقول: مش هانفرط في حبة رمل من سيناء.. ولا هانسيب القدس تضيع.. لازم يتأكد أن الكلام الجامد ده بيبوظ مصالح الأعداء وبتوع المصالح.. ومنهم علي سبيل المثال أمريكا وإسرائيل وبريطانيا وقطر وإيران واللي شكلهم.. يبقي لازم هنا الشعب يكمل صحيانه وفوقانه ويمسك بإيده وأسنانه في بلده وجيشه ورئيسه ويقف وراهم وقفة رجالة علي رأي أبويا محمد أبوسليم "محمود المليجي" في فيلم "الأرض".. وبصراحة الشعب المصري ما قصرش في حاجة من يوم ثورة 30 يونيو 2013 وناصح وفاهم الفولة كويس وعرف وكشف أسباب مؤامرة 25 يناير وضرب المتآمرين علي قفاهم وأنهي امبراطورية الإخوان المزعومة وداس عليهم برجليه.. وعشان كده الرئيس السيسي بيرد الجميل لشعبه في كل مناسبة وبينسب الفضل للشعب دايماً في كل شيء لو بيتعمل.. ومهما حصل ومهما شفنا محدش هايقدر يلوي دراعنا أبداً.. عشان احنا المصريين.. وعشان ربنا بيحبنا.. عملنا ثورة 30 يونيو وجابلنا الرئيس السيسي.. وبمناسبة الرئيس السيسي هاقول علي حاجة حصلت معايا الأسبوع اللي فات.. والله العظيم ثلاثة ما هي نفاق ولا تأليف.. سواق تاكسي بيقولي عاجبك حال البلد.. قلت له الحمد لله.. سكت شوية وقال وهو ايه اللي عمله السيسي.. فقلت وافرض أنه ماكنش وافق يشيل رقبته علي ايديه ويشيل مسئولية البلد كان إيه بقا حالنا دلوقتي.. وتصدق بالله ياسطي.. قال لا إله إلا الله.. قلت الرئيس السيسي غلطان أنه شال مسئولية ناس زينا.. كان عليه بإيه وجع القلب ده.. ما كان كمل وزير دفاع وطلع علي المعاش وعاش زي بقية الناس.. فقال الأسطي تصدق يا بيه معاك حق.. ده شايل بلاوي عننا.. وكتر خيره أنه مستحمل.. قلت: ده خريج مدرسة ومصنع الرجال.. ده ابن القوات المسلحة يعني بيستحمل أي حاجة عشان البلد وبس.. ولما بقي رئيس جمهورية بقي بيستحمل عشان البلد والشعب.. قال السواق: يا بيه كلام مظبوط وزين بس محدش بيفهمنا كده ليه؟!.. فقلت: عشان معظم الفضائيات همها علي البيزنس والأجندات وبس.. لكن البلد مش في دماغهم خالص.. وهنا وصلت مكاني ونزلت.. وبعدها سرحت في اللي حصل وقلت في سري "الله يخرب بيت أم المؤامرات وربنا يولع في أي قناة وصاحبها إذا كانت ضد البلد".. وبرضه محدش هايلوي دراعنا.. والسيسي هايكمل معانا إلي آخر نفس.. وتحيا مصر.
** هو احنا عندنا مسئول عن الصحة؟!.. أشك.. لأن عربيات الإسعاف بقت تحفة وعشرة علي عشرة والعربية من دول ولا فندق خمس نجوم من جوه.. والمسعف علي أعلي مستوي.. ولكن علمت أن هناك عجزاً رهيباً في سواقين الإسعاف وأنه تم طلب تعيين خمسة آلاف سائق وتقدم مليون ونص مليون سواق.. ومرفق الإسعاف ينتظر أن تحن عليه وزارة المالية.. ولو كان مسئول الصحة عايش معانا كان خلص الموضوع في كلمتين مع وزير المالية بدلاً من أن يتم منع توصيل المريض من المستشفي للبيت بين الساعة ستة صباحاً وستة مساء.. وللأسف مسئولو الإسعاف شغالين بالمثل الشعبي "الشاطرة تغزل برجل .......".. وبرافو رجال الإسعاف.. وربنا يكرمكم!!
** واحد كان عاوز يبقي رئيس جمهورية.. ولما خرج من السجن لقي مراته بتحب واحد ثاني فطلقها.. وبعدين عاش دور الزعامة أيام المؤامرة إياها.. وبعدين طفش.. وبعدين بيشتم في البلد ليل نهار.. وبعدين نصب علي شوية عيال عبيطة وشغلهم خدامين عنده.. وبعدين مابيدفعش فلوسهم.. فقاموا هاجوا عليه وقريب قوي هانسمع عنه سمع خير.. عرفوا مين هو؟!
** أيوة كده.. هو ده الشغل واللا بلاش يا خطيب.. مش تقولولي اسمه أيه.. عودة المياه لمجاريها بين الأهلي والمصري خبطة معلم بإمضاء هاني أبوريدة.. والجايات أكثر!!
** إخواتنا وحبابيبنا وأصحابنا وجيراننا.. كل سنة وأنتم بخير بمناسبة أعياد رأس السنة.. وبعدها عيد الميلاد.