علي عيني

أيوه.. عندنا كبير

ہہ الذين يحبون البلد هم الذين يبادرونني بجملة "والله الريس هو اللي شغال ومقطع نفسه عشان البلد".. وبالطبع كلنا شايفين ده كويس قوي زي الشمس.. يبقي نخللي عندنا شوية مفهومية ونعرف ليه حملات التشكيك شغالة علي ودنه ضد الريس.. وللأسف بيساهم فيها الأداء السيئ والفشل الذريع لمعظم الوزراء والمحافظين.. ولكن وبحق ربنا مع إن غلاء الأسعار بيكوي الناس وجايبلهم "إحباط" إلا إن جواهم إحساس قوي جداً بمدي ما تتعرض له البلد من خطر ومؤامرات وده اللي مخليهم صابرين وهايصبروا عشان محدش بصراحة عنده استعداد يرجع للأيام السودة والهباب والضلمة والرعب اللي شفناها وعشناها كلنا مع 25 يناير وربنا كرمنا آخر كرم بثورة 30 يونيو.. والمثل بيقول "اللي معندوش كبير يشتري كبير" واحنا الحمد لله عندنا كبير.. وكبير قوي كمان وبيعامل ربنا فينا وعشان كده كرمه وهايكرمه كمان وكمان.. وإلي شعب مصر أقول "صدقوني. . انتو خايفين من إيه.. إذا كان ريسكم مش خايف من حاجة وعارف بيعمل إيه.. بس ممكن شوية عقل في اللي بتسمعوه.. والله العظيم تلاتة كلها حبة صغننين وهاتشوفوا العجب وهاتشوفوا مصر هاتبقي إيه وازاي وفين.. اطمنوا.. مصر لا نامت ولا عمرها هاتنام طول ما فيها رجالة بجد وحق وحقيقي عينيهم مفتحة ليل نهار وربنا يحرسم.. وطول ما فيها رئيس بينام ساعتين بس كل يوم.. وطول ما فيها جيش بيموت في ترابها.. وطول ما فيها شعب زيكم بيحبها".. وتخيلوا بلد مادخلهاش فلوس وبتصرف من اللحم الحي بقالها ست سنين ولسه ناسها عايشين وبياكلوا ويشربوا ويقعدوا ع القهوة ومحدش منهم مات من الجوع ولا العطش.. مش تبقي دي مصر وشعبها برضه اللي غايظين "كل ولاد الكلب"..!!
ہہ صفاء حجازي: صباح الخير.. صدرت قرارات مجدي لاشين أرقام "17 و217 و218 و278" لسنة 2016 بتعديل المسمي الوظيفي لمخرجين ومعدين ومحرري ترجمة لمذيعين بالفضائية المصرية رغم مذكرة التنظيم والإدارة برئاسة سهير أسعد في 8 يناير 2015 بعدم صلاحية معظمهم كمذيعين.. ثم جاءت لجنة فض المنازعات في 11 يوليو الماضي وقضت بإلغاء القرارات.. ورغم علمنا بأن قرارات اللجنة غير ملزمة لكن - بالله عليكي - لما نعرف حاجة غلط نقوم نصلحها واللا أرجع لكلام واحد صاحبي بيقول "عاملة نفسها نايمة" وأنا عارف إنها مش نايمة وشوفوا عملت إيه في الكافتيريات..!!
ہہ لا حديث في قطاع القنوات الإقليمية كله إلا عن الحالة النفسية التي أصابت هاني جعفر بعد أن انكشف أمام الجميع وثبت "عجزه" عن إقناعهم بأنه قاعد.. وأبشر الجميع بأن الست اللي بتسنده في مجلس الوزراء خلاص "بخ" والمستشار "باي باي".. وإذا كان لديه شوية يقدم استقالته أو يبقي "مستشار" بعشرة آلاف جنيه.. ويابلاش..!
ہہ عبدالحكيم التونسي: بجد انت محترم.. بس بتتكلم عشان واحد مش جدع..!!
ہہ حسين زين: تتصور مجدي لاشين بيحارب قناة "ماسبيرو زمان" وبيعرض مسرحيات وبرامج أبيض واسود.. ياساتر.. حتي انت مش سايبك في حالك..!!
ہہ طارق نور: كل عام وأنتم بخير.. نسبة مشاهدة قناتك بقت "27%" بسبب "الحمالات" اللي عندك.. مبروك عليك وخليها تنفعك..!!
ہہ تعالوا نروح نقابة السينمائيين وما تعانيه من أزمة رهيبة كان الله في عون مسعد فودة حيث تحتاج 2.5 مليون جنيه شهرياً للمعاشات والعلاج بينما الموارد "خمسة تعريفة" ولا القنوات ولا شركات الإنتاج بتسدد اللي عليها للنقابة لأن الدفع كله بالأجل.. وهذا أحد أهم أذرع المؤامرة ضد مصر كلها.. فهناك ضرب لصناعة السينما والدراما من قطر وتركيا وإيران وفتشوا عن القمر الصناعي القطري "سهيل" الذي يضرب نايل سات وعرب سات في مقتل.. وعلي رأي واحد صاحبي "ولسه عاملة نفسها نايمة".. وأنا أقول "لأه.. لا نامت ولا عمرها هاتنام.. لكن ممكن تعمل نفسها نايمة ومش لازم نعرف السبب"..!!
ہہ رئيس القناة الخامسة اسمه أحمد كحيلو.. ياخوفي بدال ما يكحلها يعميها..!!
ہہ مبروك لأحدث عروسة فوق الخمسين في ماسبيرو.. ربنا يهدي سرك.. صحيح الحب حلو ومابيستخباش..!!
ہہ سألوني: مفيش جهة معينة بتقرأ اللي بتكتبوه وتحقق فيه وتحاسب كل الفاسدين والفاشلين..!!
ممكن حد يجاوب..!!