جمهوريتنا

سمير الجمل

كل عام وقراء "جمهوريتنا" بخيرة وسعادة وأمن وأمان وخالص الأمنيات بأن يختفي الكدب ويخرج من حياتنا ولم يعد إلي الأبد كل انواع الكدب طبعا.. الكدب الأبيض وبمناسبة اليوم - أول ابريل - وكعادة المصريين التندر فيه باطلاق - كدبة ابريل - في أول أيام هذا الشهر.. تعالوا لنتعرف علي أشهر كداب في الفن بمصر.
انه محمد احمد المصري الذي اشتهر بشخصية أبولمعة الاصلي الفشار أو الكداب خفيف الظل في فرقة ساعة لقلبك والبرنامج الاذاعي الشهير الذي كان يحمل هذا الاسم وهو من مواليد أول فبراير بمدينة الزقازيق محافظة الشرقية وذلك عام 1924 ورحل عن حياتنا في 31 يناير 2003 حصل علي بكالوريوس الفنون التطبيقية ثم دبلوم معهد التربية للمعلمين عام 1949 ليعمل كمدرس ثم ناظر للمدرسة السعيدية فوكيل وزارة التربية والتعليم وكان ايضا مديرا للعلاقات العامة بالتربية والتعليم ومع كل هذه المناصب الجادة الناجحة كان من نجوم الفكاهة واشتهر طوال مسيرته بشخصية "أبولمعة".
أبولمعة
أبولمعة الأصلي هو شخصية ابتدعها الفنان محمد احمد المصري رحمه الله واشتهر بفرقة ساعة لقلبك بهذا الاسم وهي شخصية تمثل المصري الفهلوي الذي يضحك علي الخواجات في شخص الخواجة بيجو الذي كان ايضا من اعضاء فرقة ساعة لقلبك واسمه فؤاد راتب رحمه الله وكان أبولمعة وبيجو من الشخصيات التي اضافت البسمة علي وجوه كل من يسمعهم وكانا نجمين متألقين في الخمسينيات والستينيات من القرن الماضي.
قال أبولمعة: يا سلام يا خواجة يوم ما خدت بطولة العالم في البوس.. كان يوم.. الخواجة بيجو: ايه خكاية البطولة دي؟ أبولمعة: هوه انا ماقولتكش؟ الخواجة بيجو: لا يا خبيبي ماقولتيش.. أبولمعة: كان يوم له العجب يا خواجة اعلنوا في بلاد الاسكيمو عن مسابقة عالمية لأحسن بواس للممثلات بتوع بره خدت بعضي ورحت يوم المسابقة ووقفت الممثلات طابور طويل.. أوله في الاسكيمو وآخره في بولاق الدكرور ودخلنا احنا واحد وراء واحد وهات يا بوس واحضان في الممثلات.. وقعدت علي كده كتير.. 9 شهور يا خواجة وكنت بابوس بسرعة 100 ممثلة في الثانية.. وبعدين لجنة التحكيم أعلنت فوزي ببطولة العالم في البوس وخدت الحمالة البمبي.. الخواجة بيجو: ايه الخمالة البمبي دي؟ أبولمعة: هوه انا ماقولتكش؟ يا خواجة بطل العالم في المصارعة بياخد حزام اسود وبطل العالم في البوس بياخد حمالة بمبي ودا كان بداية دخول الحمالة في مصر وبعدين بقي يلسبها اللي يسوا واللي مايسواش.. الخواجة بيجو مين اللي مايسواش ده يأبولمعة؟ تعمل أيه يابو لمعة؟. قلت أعمل معزي الخواجة بيجو: معزي في مين يابو لمعة؟ هوه فيه حد مات؟ أبولمعة: افتح قناة ال WC وانت تشوفه.. مقرف وعامل نفسه أبوالعريف وعمال يهاجم في الإسلام. بس يا خواجة ومن ساعتها كل ممثلات العام يتمنوا يبوسوني زي ما حصل يوم المعزي.. الخواجة بيجو: ايه موضع المعزي ده؟ أبولمعة: هوه أنا ماقولتكش؟ دكان يوم له العجب يا خواجة.. ماخبيش عليك أنا لقيت الولية أم لمعة مراتي كبرت وسلمت النمر والبوسة منها بقي طعمها زي الأكل البايت الحمضان اللي بنديه للبواب ووحشني بوس الممثلات بتوع بره قعدت افكر تعمل ايه يا أبولمعة؟ هو فيه خد مات؟ أبولمعة: هوه أنا ماقولتكش؟ أنا قلت لأم لمعة روحي عند ابوكي في الصعيد اقعدي كام يوم لأن مسافر بلاد الهونولولو. بس يا خواجة هيه سافرت من هنا وانا ماكدبتش خبر رحت عامل اعلان علي صفحتي في الفيس بوك والتويتر شعلل الدنيا قاطعه الخواجة بيجو باستنكار وقال: يالنافوخ بتاع الأنا!! فيس بوك ايه وتويتر ايه ياأبولمعة؟ هوه ايامنا كان فيه الخاجات دي؟ ده ماكانش فيه انترنت من أصله.. أبولمعة: ايوه صحيح فوت دي يا خواجة. الخواجة بيجو: خاضر.. راخ نفوت.. ايه الاعلان ده علي الفيس بوك والتويتر أبولمعة: ماطولش عليك قوللي لأ طول أنا نشرت في الاعلان ان أم لمعة ماتت مفيش ساعة لقيت الرسائل جت لي بالملايين من ممثلات السينما في هوليوود وأوروبا وكلهم عايزين ييجوا العزا. الخواجة بيجو: وعملت ايه في المطب ده؟ أبولمعة: فوتك في الكلام أنا رحت عامل صوان في الاستاد وجبت مقريء عشان يحيي الليلة اسمه الشيخ منصر وواحد صاحبي اسمه الاستاذ محمد حلمي اللي بيكتب عمود يومي في جورنان المصريون عنوانه صباحك عسل كان عارف ان الصوان ده ملعوب وحب يلاعبني فبعت لي مقريء ملعب اسمه الشيخ مبعر.. قاطعه الخواجة بيجو باستنكار وقال: وهوه أيامنا كان فيه جورنال اسمه المصريون؟ أبولمعة: آه.. ما تفوت دي كمان يا خواجة.. اخوك مزنوق.. الخواجة بيجو غاضبا: راخ نفوت ايه واللا إيه ياأبولمعة؟ أبولمعة: الله اشمعني يعني فوتوا للشيخ اللي قال ان من السنة ان الراجل من دول لما يكون مسافر ويرجع من السفر مايصحش يدخل علي البيت علي مراته كده زي النطع ولازم يتصل بيها الأول من المحمول عشان لو معاها راجل بايته في حضنه تلحق تنفض له؟ هوه كان فيه محمول؟ الخواجة بيجو: خلاص.. راخ نفوت دي كمان بس بعد كده موش راخ نفوت خاجة تانية ابدا وبعدين؟ ايه اللي خصل؟ أبولمعة: جم الممثلات يا خواجة م الشرق والغرب لبست أنا الجلابية الدبلان المخططة بتاعة اخويا شلبي وفوقيها الحزام البمبي ووقفت علي باب الصوان آخد العزا.. الخواجة بيجو: وعملت ايه مع الممثلات بتوع بره؟ أبولمعة: هوه انا ماقولتكش؟ كانت ليلة لها العجب يا خواجة.. جم الممثلات واحدة ورا وحدة وأول ماشافوني هجموا عليه وهات يا احضان وبوس.. البركة فيك يأبولمعة: كلنا لها يا أبولمعة.. آدي حال الدنيا يا أبولمعة.. وبين كل كلمة وكلمة 100 وحضن بوسة.. اصلهم بيحبوا بوس الرجالة الغرب قوي ومتعودين عليه!! وبعدين قعدوا يبوسوا المعازيم والمعزي اتقلب مبوسة لكن يا خواجة كله كوم والممثلة بتاعة البرازيل دي كوم.. الخواجة بيجو: مين دي يا خبيبي؟ أبولمعة: هوه انا ماقولتكش؟ ماكدبش عليك يا خواجة.. هيه ممثلة يعني مش قد كده طول عمرها كومبارس بتاخد ادوار الدرجة التالتة يعني تطلع كده في دور خدامة وأكبر دور عملته كان عاملة نظافة في دورة ميه رجالي وبعدين كبرت وبقت قرشانة مش لاقية حد يبوسها فبقت تتلكك علي أي مناسبة فيها ممثلين عشان روح تبوسهم حتي في العزا مابتعتقش.. الخواجة بيجو: والقرشانة دي بتاعة البرازيل عملت ايه لما جت العزا؟ أبولمعة: كانت لابسة برنيطة عشان تداري صلعتها وبعدما خلصت بوس واحضان معايا هجمت علي المعازيم وهات يا بوس واحضان لكن كله كوم يا خواجة واللي حصل مع أم جميل حمالة الحطب وزميلاتها لما جم العزا كوم.. الخواجة بيجو: ايه اللي خصل؟ أبولمعة: هوه أنا ماقولتكش؟ المعازيم أول ما شافوهم هجموا عليهم ونزلوا علي دماغهم ضرب بالقباقيب. الخواجة بيجو: ماكانش معاهم رجالة يخموهم؟ أبولمعة: كان معاهم ابولهب وابوقصة وابوحمالة وابوديل.. بس ماخبيش عليك كانوا مشغولين.. نازلين بوس واحضان في بعض!! لكن يا خواجة كله كوم.. واللي حصل مع ابوستيللا كوم.. الخواجة بيجو: مين ابوتسليا ده؟ أبولمعة: هوه انا ماقولتلكش؟ ده هلفوت جه ومعاه قرشانة لابسة قميص نوم شفتشتي احمر شفاف وف ايدها كوتشينة.. وهوه ماسك في ايده ازازة مكتوب عليها خمرة الاخلاق وكانوا سكرانين.. بس يا خواجة وعينك ماتشوف الا النور.. المعازيم أول ماشافوهم هجموا عليهم.. الخواجة بيجو: وعملوا فيهم ايه؟ أبولمعة: ماطولش عليك.. الست خرجت بعد ساعتين حامل في 3 توائم.. الخواجة بيجو: طب وابوستيللا؟ أبولمعة: هوه انا ماقولتكش؟ فكر فيها علي مهلك!
زكي مصطفي
البدنجان "بيض"عند الجعان!
عاد أبواحمد الرجل الادكاوي الطيب من عمله كالمعتاد في الثانية بعد الظهر وسلم علي زوجته وسألها سؤال كل يوم: طبختي ايه للغدا يا أم أحمد؟ قالت: اطبخي يا جارية.. كلف يا سيدي.. قال مش فاهم.. قالت يعني تنزل تشتري اللي نفسك فيه وانا اطبخ.. قال: طيب ماشي افتحي التليفزيون اشوف شريط الاخبار واستريح وانزل اشتري الغدا.. فتحت التليفزيون وجلست بجواره بالمصادفة كان البرنامج المعروض هو حلقة جديدة جدا من برنامج المطبخ الذي يعرض طريقة عمل الطبخة والمقادير علي الهواء مباشرة نقلا من احدث مطبخ مساحته اكبر من مساحة شقة أبوأحمد كلها وكمان بالمصادفة الحسنة ان الاكلة التي كان يعرض طريقة عملها البرنامج الموقر اسمها "فتة الذنجان بالزبادي" من اسمها وعنوانها اعتقد أبواحمد الراجل الطيب وزوجته التي هي اطيب منه انها اكلة شعبية رخيصة التكاليف سهلة الاعداد فأمرها بمعرفة الطريقة وكتابة المقادير حتي ينزل يشتري لها المطلوب وشعر بأنه سي السيد الذي سيكلف وانها الجارية التي ستطبخ فاخرجت ورقة وقلما وكتبت القائمة بسرعة قبل ان تختفي من علي الشاشة وكانت المقادير كيلو واحد باذنجان ونصف كيلو لحمة مفرومة وعلبتين زبادي حجم كبير ونص كيلو طماطم ونص كيلو بطاطس وبصلتين وملعقة ملح وملعقتين سمنة وعيش محمص مقطع وبهارات لحمة واربعة فصوص توم وفلفل اسود والحق يقال ان أم احمد تابعت باهتمام وعرفت وفهمت طريقة التحضير والطبخ وهو جالس بجوارها يعلق ويضيف بعض المعلومات المهمة مثل خدي بالك التقليب يكون بملعقة خشب.. ابقي خلي البصلة في السمنة لغاية ما تتحمر.. البطاطس تتقطع مكعبات وهي ترد وتقول: حاضر.. عارفة مظبوط وبعد ان قالت مقدمة البرنامج وبالهنا والشفا.. نظرت أم أحمد إلي زوجها وناولته الورقة المكتوب فيها المقادير لكي يشتريها وكتب ثمن كل صنف ثم جمع المبالغ فكانت النتيجة 75 جنيها يعني لو نزل يشتري الطلبات لازم يكون معاه مائة جنيه تحسبا لأي طاريء.. ضحك أبواحمد وهو يقول لزوجته: اسم الأكلة فتة الباذنجان وتكاليفها مائة جنيه.. قومي اسلقي بيض وخلال ربع ساعة كان البيض المسلوق يحتل مكانه المعتاد علي الترابيزة وسط طبق المخلل وعيش الطاقة وكباية الميه الساقعة وبعد الغدا شرب الشاي ثم ضحك في نفس الوقت الذي ضحكت فيه أم احمد وقالت له: ساعة بنشوف البرنامج وطريقة الطبخ وفي الآخر اتغدينا بيض مسلوق.. قال: الحمد لله بس يارب تحل البركة علي "بيضنا".
"لحسه" من الدهان وهتبقي"حصان"!!
لجأت معظم الفضائيات إلي عرض اعلانات منتجات احتيالية للاحتيال علي المشاهدين ومنها أنواع كثير واللي ما يشتري يتفرج ويا مكذب تعال شوف وكله آكل عيش أراضي علي البحر مباشرة تمليك سعر المتر خمسين جنيه نقدا وبالتقسيط وبدون مقدم وأيضاً فلل وشقق سوبر لوكس علي التسليم وادخل علي خبير الأعشاب والعلاج جاهز للسمنة والنحافة والتخسيس واحذر من منتجات مجهولة المصدر وخلي بالك من موافقة وزارة الصحة وتأكد من الترخيص وكمان عندهم علاج لكل اللي بيشكي من سقوط شعره والفائدة مجربة أكيد ومن الأعشاب إلي الأخشاب ثلاث غرف نوم- سفرة- انتريه كله ده بخمستاشر ألف جنيه وادخل علي إعلان الكريمات كريم لعلاج الإدمان وسحب المخدر من الجسم والدم وبدون أعراض وبدون العودة مرة أخري للإدمان وأيضاً كريم لعلاج آلام العظام ومعه قربة سحرية عصرية هدية والشفاء مضمون ميه في الميه وادخل علي إعلان مبيد الحشرات بضمان خمس سنوات خبراء في إبادة الحشرات الزاحفة والطائرة وكمان الصراصير والفئران واطلع من هذا الاعلان ادخل علي إعلان الأسطورة للرجال والنساء والكيرم الساحر علي تغيير حياتك وعنده الحل الأكيد والمضمون وانهاء مشاكلك لحد متقابل وجه الكريم وأدخل علي إعلان الروحانيات الشيخ الوحيد الصادق في علم الروحانيات بشهادة الملايين الشيخ المغربي ومش عارف ليه بالذات بيكون مغربي مش مصري ولا جزائري ولا حتي صعيدي مش مهم والمهم بيقدم علاجا للسحر والمس والقرين والتحصين وجلب الحبيب والحبيبة في 3 ساعات ويجعله خاتما بالاصبع وتيسير الحال يا ميسر الحال وكله كوم وجلب محبة الحموات كوم تاني ورد المطلقة وجلب السارق ومعه المسروقات والرزق والزواج وموافقة الأهل علي الشريك وايضا لديه أقوي القلادات وخرز المحبة وأرقام تليفونات الشيخ بالهبل متعدش محمول وأرضي وتعال لمفسر الأحلام وتنهال عليه المكالمات من كل مكان والكل عايز يحكي له اللي شافه في منامه والشيخ يفسر علي مزاجه ومين هيقدر يراجعوا والكل يصدق بدون تفكير.
القارئ حمادة بدران اسنا الأقصر