إسماعيل يس في حملة تمرد

الخواجة بيجو: أخويا العزيز بتاع الأنا
سومعة: أنا...
الخواجة: بأد التخية
سومعة: خييية
الخواجة: أنا زعلان علسان مس جيتو إمبارخ
سومعة: ااارخ
الخواجة: الخمار بتاع الأنا جيتو في نص السكة وخرم
سومعة: خرررم
الخواجة: وكل ما أنا يقولو تيك تيك تيك يهز الرأس بتع الهوا وميرداس يمسي
سومعة: هسسسسسسسسس
طبعًا دي أظرف رسالة عرفتها السينما المصرية وقد إيه الخواجة بيجو وسومعة والقصري احتاسوا إنهم يكتبوا «تك تك تك» واستنجدوا بعرض المجمع اللغوي.. واقترحوا على الخواجة بيجو إنهم يغيروها أو يبدولها بكلمة تانية.. لكن عشان الخواجة بيجو مش عايز يكذب مُصر على استخدام الكلمة دي.
لي صديق من حملة تمرد جمعتني الصدفة به في مكان عام ولقيته ماسك ورقة وقلم وعمال يكتب رسالة وكل شوية يروح مقطع الورقة ويكتب غيرها بصراحة استفزني المنظر ورحتله وقلتله إيه يا حمادة كل دا ورق مقطعه؟! قالي أصل بكتب رسالة للشعب ومحتار في كلمة قوي.. قلتله رسالة للشعب مرة واحدة قالي قصدي بيان يعني.. قلتله طب عنك إنت ومليني بقى وناولني الورقة والقلم وفضل يملي:
تمرد: شعبي الغالي العزيز بتاع الأنا
أنا: أنا
أنا زعلان علشانك قوي علشان إنت مضحوك عليك من الجماعة بتاعة هما اللي كل شوية تقولك هنعمل نهضة هنعمل نهضة وأتاري النهضة دي طلعت خازوق
أنا: ووووق
تمرد: علشان كدا إحنا بنقولك تعالى معانا يوم تلاتين علشان نشيل «.......» بتاع المرشد
وجيت عند الكلمة دي وقلتله يييييييييس اربط عندك.. إنت عايز تحبسني أنا مش هكتب الكلمة دي قالي ما هي دي الكلمة اللي مجنناني من الصبح ومش عارف أختار كلمة مكانها لأنه مدناش فرصة لأي اختيار تاني غير الكلمة دي...... قلتله أنا في عرض مجمع اللغة العربية.. اقعد اكتب إنت اللي أنت عايزه.. وقبل ما أمشي قربت من ودنه عشان أوصيه على كلمة يكتبها في رسالته وقلته.. القصاص.. القصاص.