أم ناديا أو بسمة

الناس تفاعلت مع الداعية لانها عاشت الأحداث

هي فنانة اولا وسياسية ثانيا كانت من أبرز الفنانين الذين شاركوا في ثورة يناير وزاد ارتباط اسمها بالسياسة بعد زواجها من عمرو حمزاوي مؤخرا عرض لبسمة مسلسل الداعية الذي حقق أعلي نسبة مشاهدة في رمضان كما رزقت بابنتها الاولي ناديا ولم تكن الأخبار السارة فقط من نصيب بسمة فقد تعرض حسابها علي الفيس بوك للسرقة وقام قرصان النت بسبها علي صفحتها وتعرض زوجها عمرو حمزاوي لهجوم شديد فكان لنا هذا الحوار لتشرح بسمة كل ما جري لها مؤخرا.
* اولا مبروك علي نادية ما سر اختيار الاسم خاصة وانك اعلنتي خبر الحمل في برنامج باسم وابنته اسمها نادية؟
** اسم بنتي يكتب ناديا. وطبعا له معني باللغة العربية. لكن كمان له معني أجنبي وهو "أمل وطموح" وأعجبني المعني. رغم أننا كنا في البداية. ولحد وقت الولادة. عندنا اختيارات أخري للاسم وكنا لسه بنفاضل بينها. إلا أن ظروف مرض والدة عمرو كانت سببا أساسيا في استقرارنا علي تسمية البنت زيها. كما أن نطق الاسم مش بعيد أوي عن نطق اسم والدتي. نولة "ينطق بفتح النون وتسكين الواو" أما بالنسبة لعلاقة اسم البنت بالإعلان عن الحمل في برنامج أبونادية. باسم يوسف. فهي مجرد صدفة. خاصة أن وقت ما اشتركنا في الحلقة كانت اختيارات الأسماء مختلفة تماما "كان نفسي اسمي بهية ومش عارفة ليه كل الناس اتريقت علي!!".
* مسلسل الداعية حقق اعلي نسبة مشاهدة في رأيك ما سر خلطته؟
** سعيدة جداً بنجاح المسلسل وتحقيقه لنسبة مشاهدة عالية وتصنيفه احد انجح مسلسلات رمضان السنة دي.. واعتقد في عوامل كتير ساعدت علي النجاح ده. اولها القصة وأحداث المسلسل. فالمشاهد استمتع بقصة الحب اللي قد تكون مستحيلة. وتعاطف معاها.. ومع بقية قصص المسلسل ده علي خلفية أحداث هو عارفها. وبعض المشاهدين ممكن يكون شارك فيها. من مسيرات ومظاهرات الشهور الأخيرة.. مثل ذكري محمد محمود. ومسيرات الاستفتاء علي الدستور وذكري الثورة الثانية وغيرها من المسيرات.. مشاهدين كتير شاركوا في الأحداث دي أو تعاطفوا معاها. وبالتالي لما شافوها في سياق درامي تعاطفوا معاها من تاني. كمان اعتقد أن كتير من المشاهدين قدروا مجازفة كل طاقم العمل بتقديم المسلسل ده قبل 30/.6 وكمان قدروا المجهود المبذول من كل اللي شاركوا في العمل. بيتهيألي دي من أهم أسباب في نجاح المسلسل.
نهايتان للمسلسل
* لماذا نهايتين للمسلسل؟
وجود نهايتين للمسلسل فكرة رائعة من وجهة نظري. لانها بتدي المشاهد حرية الاختيار : أما بنقول أن دي نهاية الحدوتة أو الحدوتة مكملة.. بتدينا فرصة اختيار المستقبل وحق تقرير مصير.
* كانت أعراض الحمل واضحة في المسلسل فهل كان من الصعب الاداء وانت حامل؟
** طبعا الشغل مع الحمل مكانش أسهل حاجة في الدنيا. وهنا لازم انتهز الفرصة علشان اشكر بعض الناس.. أولهم شركة العدل جروب للانتاج لمجازفتهم. لما عرفت موضوع الحمل ماكنتش لسه بدأت تصوير. لكن قررت أخلاقيا أنه لازم اقولهم واسيبلهم حق تقرير الاستمرار معايا أو لا. وهم قرروا. رغم أن ده مكلف انتاجيا اكتر من العادي. أنهم يجاروا ظروف حملي ويستبدلوا جداول تصوير بأخري علشان اخلص تصوير دوري في اسرع وقت ممكن. كمان كانوا بيوجهوا احتمالية أن حملي يبقي متعب واضطر أتغيب عن التصوير واعطل الشغل. كمان لازم اشكر المخرج محمد العدل علي تفهمه الموقف. وتغلبه علي قلقه. من نفس الأسباب السابقة. وإصراره علي استمراري في الدور. رغم أني قلتله في البداية أني متفهمة لو قرر يدور علي ممثلة أخري للدور. لكن محمد أصر علي. ووصل لأحسن الحلول الإخراجية علشان يخبي بقدر الإمكان شكلي الحامل اللي كان بيتطور مع الأيام. واشكر كل طاقم الإخراج. لأنهم المسئولين عن جداول التصوير وتنفيذها. وكانوا متفهمين ظروفي وبيحاولوا يساعدوني. ميفوتنيش كمان اشكر كل طاقم التصوير. وعلي رأسهم حسين عسر مدير التصوير. لأنهم بذلوا مجهود كبير في اضاءتي وتصويري من الزوايا اللي فيها اقل ظهور لأعراض الحمل. وطبعا لازم اشكر كل الزملاء من الممثلات والممثلين اللي ارتضوا أن جدول التصوير بتغير مراعاة لظروفي : هاني سلامة. ريهام عبدالغفور. أحمد فهمي. صفاء الطوخي. أحمد راتب. طارق التلمساني. رحمة. علياء وكل الممثلين بصراحة. والموسيقار عمر خيرت اللي فضلنا نزن عليه عشان الموسيقي يديهالنا بسرعة علشان نلحق نصور.. وأخيرا وليس آخراً. عايزة أشكر ريم العدل ومجموعة تصميم الملابس للجمهور الكبير من أول لحظة علشان نختار ملابس تخفي البطن. واشكر بطة المساعدة بتاعتي وشريف هلال وزيزو وصبري عبدالدائم وأشرف لأن الناس دي كانت أكثر ناس بتتعامل معايا بشكل مباشر وبتستحملني وأنا متعصبة أو تعبانة. اعتذر عن الرد الطويل. لكن لازم اشكر الناس دي كلها.
قمة العكننة
* كيف استطعت استعادة حسابك علي الفيس بوك ولماذا سرقوه في رأيك رغم أن زوجك من دعاة لم شمل الوطن!
** قالت إن سرقة حسابي علي الفيس بوك كانت قمة العكننة خاصة وأنا في أوائل أيام الولادة وأحاول أن أفهم وأتأقلم. وتعبانة جدا. جاءت سرقة الحساب في وقت كان من الصعب أن أركز مع الفيس بوك. لكن أسعدني كم الأصدقاء اللي كلموني في لحظتها كي أتصرف. وده معناه أنهم مصدقوش الكلام المكتوب عن لساني.. أسعدني كمان كل الأصدقاء اللي من غير ما يعلموني كتبوا علي صفحتي وعلي صفحاتهم أن الحساب مسروق. ومنهم كتير رد السارق عليهم في رسائل خاصة "البوكس" بيدعي فيها أن الحساب مش مسروق وإنما تلقيت أنا وعمرو وناديا تهديدات بالقتل وتم تكسير وإحراق سيارة عمرو!! عدم تصديق الناس دي للكلام ده معناه أنهم عارفيني وعارفين اسلوبي. المهم أننا اتصلنا بالصديق وائل غنيم اللي اتصل بناس يعرفهم في إدارة فيس بوك واستعدنا الحساب.. المشكلة اني لسه بعاني من اللي السارق عمله في الحساب.. من طرد أصدقاء وقبول آخرين معرفهومش!! أرجو محدش يزعل مني من الناس اللي بشيلها من حسابي لأنه حساب شخصي.
سرقة الحساب بأه حصلت عليه. معنديش فكره!! غالبا شخص مختل. خصوصاً بعد ما شوفت حاجات كاتبها وصور ناشرها.. ربنا ينتقم منه بأه.
محاسبة المتورطين
* هل انت مع ام ضد عودة الإخوان للسياسة؟
** أنا مع أولا محاسبة المتورطين في العنف والمحرضين عليه. وبعد كده. الناس الكويسة منهم لازم نقدر تتعامل معاهم يعني بعد يناير 2011 الشعب المصري كان مستوعب أن أكيد مش كل المنتمين للحزب الوطني وحشين وكانت المطالبة بمحاسبة المسئولين عن الفساد والمتورطين فيه والمستفيدين منه.. وكانت مطالبات العزل السياسي للقيادات. اعتقد نفس الشيء. مع تدقيق كبير وبعد فرز كثير. مفترض أنه يحصل مع المنتمين لتيار الإسلام السياسي.. أما أننا نقول كل دول حلوين. أو كلهم وحشين ويستاهلوا الحرق فده كلام بلاقيه صعب أوي..
يضايقني
* هل يضايقك الهجوم علي عمرو حمزاوي؟
** أكيد بيضايقني الهجوم علي عمرو.. عمرو آراؤه تحتمل الصواب والخطأ زي أي بشر. لكن فيه فرق كبير بين الهجوم والنقد .. في أحيان كتير بيبقي الهجوم عليه فيه تطاول وبعيد عن أصول النقد الموضوعي المحترم. وبيصل لحد التجريح والتطاول وتطليع الاشاعات.. دي الأوقات اللي بتضايقني. لأن ده مش مقبول أصلاً. إنما لما رأيه ميعجبش حد فيقوم ينتقده باحترام وموضوعية. فده هو المقبول.
* لو وجهتي كلمة لمرسي ماذا تقولي؟
** لو وجهت لمرسي كلمة هقوله كنت أتمني انك تبقي أكثر ذكاء ممن سبقوك. وليس اقل ذكاء. فهم استوعبوا في احدي اللحظات أنهم مش هيقدروا يعاندوا رغبة قطاع كبير من الشعب المصري نزل الشارع ومطالب بالرحيل.. أحب كمان ألومه علي دم المصريين اللي سال. سواء أثناء فترة حكمه أو بعد استبعاده.
* ما هو عملك القادم؟
** لسة مش عارفة إيه عملي القادم. لكن أتمني أن تعرض علي حاجات مميزة أحس من خلالها أن بيضاف لرصيدي واستمتع بيها.