صلاح عبد الله يدين طلاب الأزهر بقصيدة شعر

علّق الفنان صلاح عبد الله، على الاشتباكات التي تجري كل يوم الآن، بين قوات الشرطة، وطلاب جامعة الأزهر، بقصيدة جديدة.
حيث قال عبد الله، عبر حسابه الشخصي على موقع التواصل الاجتماعي الفيس بوك:
كل يوم الصبح
بروح على الجامعة
شايل كتاب منسوخ
وكشكول مزيّت
وقلم إسود
وعرق أبويا
وشقا عمره
اللي ضاع
عليا عشان
أحقق حلمه
وأخش الجامعة
ألاقى الجامعة والعة
وألاقى نفسي
في المظاهرة
اللي لسه طالعة .. يا دوب
ونتخانق مع الشرطة
زى كل يوم
وأحدف وأتحدف بالطوب
وأنا بهتف يسقط يسقط
والنهارده
طوبة مني جت فى راس عسكري
بس كان راجل عجوز
وفجأة يمكن من تأثير الغاز
وقعت وأنا بهتف يسقط يسقط
واكتشفت إن كتابي لسه مانفتحش
وكشكولي حرف واحد فيه مانكتبش
والقلم انكسر في جيبي
جنب قلبي .. وصورة حبيبي
صورة أبويا
وأنا لسه بهتف يسقط .. خيالي سرح
مين يسقط عشان مين يعيش؟!
ومين سقط ومين اللي بعده عاش؟!
وفجأة رحت لحد بيتنا في البلد
وشفت أبويا اللي عضم أمه باش
عشان أكمل وأقدر أخش الجامعة
اللي لسه .. ببلاش
وافتكرت إن أبويا
كان في الشرطة صول
قبل ما يطلع معاش