نقل محاكمة مبارك، جمعة الإسلاميين، عودة الملثم.. آخر الدردشات الطريفة على الفيس بوك

نتيجة للأحداث الصاخبة التي شهدتها مصر في اليومين الماضيين، انعكس بطبيعة الحال الأمر على صفحات الفيس بوك، ليصبح أربعة مواضيع فقط هي محور الدردشة والسخرية للفيسبوكيين.
فقد تناقل الفيسبوكيون أطرف وأجمد التعليقات على أربعة مواضيع وهي خبر نقل محاكمة الرئيس السابق حسني مبارك، و جمعة لم الشمل التي تحولت لجمعة تظاهرة إسلامية حيث انسحبت من الساحة كافة التيارات السياسية، ليأتي الموضوع الثالث وهو عودة الملثم لتفجير خط تبريد الغاز المتصل بإسرائيل، أما الأخير فكان إحساس المصريين بقدوم أول رمضان عليهم بدون أن يكون حسني مبارك رئيسا لهم.
أقرأ معنا أطرف التعليقات على الأربعة مواضيع التي شغلت الفيس بوك:
- حمادة هلال يغني محاكمة مبارك هتكون في أكاديمية مبارك
- بما أن المحاكمات في أرض المعارض، يبقى شعارنا هو : الفرجه للجميع .. والإعدام للمخاليع
- يعني إيه كوكاكولا زيرو
"رفعنا مبارك " من منصبه ومش عارفين نرفع اسمه من على المنشآت
- بما أن مبارك زي القرد وحلو كده وهيعملوا محاكمته في ارض المعارض
فأنا من موقعي هذا بطالب القاضي وبقوله بليز زحزحها شويه وخليها في الاستاد مش بعيد خلينا نتفرج مع بعض كلنا
- المحاكمة في أرض المعارض علشان إللي ما يشتري يتفرج .. تمترارارم تم تم
- بعد جمعة لم الشمل .. الجمعة القادمة ان شاء الله فى التحرير تحت اسم لو بتحبها .. رحلها لحد البيت
- بيقوللي اديلي مثال لدولة واحدة دينية و ناجحة بصيت في الأرض و قلت إسرائيل
- جمعة التوحيد تحولت إلي جمعة التوحيد والنور
- المخابرات السعودية في التحرير
- الثورة عاوزة حاكم ..
و الحاكم فى المحاكم ..
و المحاكم بقيت على الهوا ..
و الهوا هيجبلنا برد ..
و البرد بيجى معاه رعد و مطر ..
...و المطر بيجبلنا انفلونزا ..
وجدتها .. الحل هو :
كومتركس و لو بتنزل من 25 يناير يبقى بور كابس
- الملثم عدى المستوى الرابع في اللعبة ووصل للمستوى الخامس و المفروض يفجر الوحش فى مستشفى شرم وتبقي كده خلاص جيم أوفر.
- العربية : انفجار في خطوط تبريد محطة تصدير الغاز إلى إسرائيل في سيناء
أيوا يا فندم بس فكرة تفجير خطوط الغاز دى اتهرست ع الحقيقه 3 مرات قبل كده
وده الى يخلينى متمسك بيها أكتر لأن من كتر ماتهرست محدش هيفكر اننا نعملها
خصم 3 أيام للملثم عشان اتأخر ... الحمد لله لحقنا تفجير قبل رمضان-
- الملثم مبقاش يستخدم ديناميت بيستخدم دلوقت أر بى جى .. التجديد مطلوب برضه
- لو مبارك مات في رمضان الناس هتنقسم برضه حول مصيره في الاخرة و نصيبه من المغفرة
مفيش فايدة !!! عايش يفرقنا ميت يفرقنا
- رسالة من مبارك إلى المصريين
كل عام وأنتم بخير بمناسبة "فلول" شهر شعبان، وقرب بداية شهر رمضان ال "مبارك" ويا رب يكون الشهر كله "جمال" و"سرور" ومصر توصل فيه لل "علاء" وتعيش في "عز" وتبدأ على "نظيف"، وانأ بأكد على "عزمي" الشديد على ذلك لأحصل على "صفوت" الحسنات، ويجعلنا من "عبيد" الله الصالحين
- أيام مبارك كنا بنفطر الساعة خمسة .. ادينا هنفطر الساعة سبعة .. عاجبكوا كده؟!!ا
ارجعلنا يا غالى