وقفة حساب.. قصيدة للشاعرة منال درويش

لما العَجَز يخنق طريقي ودنيتي
والخوف بيقفل ألف باب
لما المهانة تبقى طبع في سكتى
والحلم مقدرش ألمحه، ويادوب سراب
لما الكرامة تبقى عيب !!
ونصرة المظلوم ،،
وقفة محتاجة لعقاب !
لما الضجيج يعلا ،
لإنى قلت لا
للعتمة والذل الكسير،
ينهال عليه ألف لعنة،
وميت سباب..
لما انكوي بالنار،
واصرخ مستجير !
يتخاذل الأعوان ،
ويتكاتروا الكلاب !
لما المقاومة تبقى ضالة ،
ونكرر الفكرة المذلة ،
ونقول عليهم صورة للإرهاب !!
يبقى لازم نبتدى وقفة حساب!!
****
لما البيوت تتهد ،
فوق راس اللي ساجد،
واللي نايم،
واللي حامد ربه،
ع الجوع والضباب!
لما الوحوش تنهش ،
عضام قلب الطفولة والبراءة ،
وتتشرد أمانينا العِذاب
لما القصيدة تبقى مُرة ،
تخنق مرارتها المجرة ،
وتضيع حياتنا ، ف ميت عَذاب ..
لما ابني يشرب الذل ف طفولة ،
والخنوع: يبقى رجولة
والتراجع: يبقى أحلام البطولة
والموت: يبقى في غاية السهولة
يبقى حتماً نبتدى وقفة حساب !!
ح اصرخ بعلو الصوت ،
لو ألف مرة ح اموت ..
عمرى ما أقول يا سكوت
واروى بدمى الهضاب
أنا قلبي داب شاعر
مهما الألم واعر ،
حلمي تاريخه فِ كتاب
اخرس يا صوت العبيد
بددت أحلامي ،
عزمي طريقه شديد
وطريقي قدامي
يا تارك الأحلام
جاري ورا الأوهام
من غير كلام وملام
أنا قلبي صخرة حديد
عارف السكة
وقت الحساب آتي
والدايرة ع الباغي
وح اعيد حساباتي
مع كل خاين جبان
صان الحياة بالذل
ضيَّع معاه الكل
وتاه بلا عنوان ،
وقفة حساب جاية
مع كل خاين جبان