اكتشاف .. قصيدة للشاعرة منال درويش

فجأة أصحاب المعالى فِ برج عالى
قرروا بالآتى والجاي م الكلام
راح نطبق الاكتشاف
اللي يقرا كل أفكار الخلايق
واحنا قاعدين أو نيام
لجل نعرف
مين بيتكلم علينا
ومين يخاف ؟!!
ومين واخدله منا ساتر
وللا متغطي بلحاف ؟!
حتماً نطبق الاكتشاف
نبتدى ..
يبدأ البث المباشر من هناك
من أعلى نقطة في المناطق والحدود
كل الحقايق ملكنا
وما فيش إرادة تهزنا ،
دا احنا اللي مالكين الوجود
ويا ويله اللي ح نضبطه بفكرة كانت ضدنا
من غير كلام ح يكون مشرَّف عندنا
ونسمَّعه صوته اللى كان من حظنا
يا بختنا !!
لازم نطبق الاكتشاف !!
*****
الصورة في الأول غريبة مشوشة
والدنيا لما تتكلم ... تخاف
ملعونة يا كلمة سكات
متغمسة بعرق الضعاف
نبدأ هناك ..
واحد صاحبنا حاله حال
الذبذبات عليت وابتدى الإرسال
وصاحبنا قال:
خمسين سنة عمرى
وما اتغيرت أحوال
الدنيا ماشية وأنا واقف
سنين وطوال
الهم طايل سكتى
وقضيتى ،
إنى عشقتها ... موال
يرد صاحب المعالى:
ابعت للولا مرسال
شوفه ليه متكدر ؟!
وبرغم السن قلبه اخضر
وفجأة تعلى الذبذبات تانى
ويظهر عقل فِ الصورة
بيلعن كل أصحاب المعالى صوت وصورة
كلامه هز وجدانى، وقال تانى:
الغلا طايل سنينَّا
والحلم أشلاء ع الطريق
وانا كنت باحلم ليها جنة
وعشقتها كالتمر حنة
أنا عايز أهرب منها
ديه اللي كنت بحبها !!
أنا خدت إيه ؟!!
غير حلم مرمي فِ أرضها
والوحلة طايلة وشها
أنا خدت إيه من حبها ؟!!
يصرخ صاحبنا أبو المعالى
هاتوا الولا بسرعة هاتوه
لازم ما نفهم قصده إيه
ولما ح نخلَّص ...
هناك يللا ابعتوه ..!!
******
الجهاز راح ينفجر
وكأنه عايز ينتحر
مِ اللي شافه واللي سمعه ف العقول
الناس بتصرخ من سكات
اللي سرق عايز كمان
واللي نهب طالب أمان
واللي اتقهر والغدر طايل سكته
مستنى يوم همه يزول
الجهاز راح ينفجر ،
وابو المعالى لسه عايز يبقى غول !!
وابو المعالى لسه عايز يبقى غول !!