أم شهيد لباسم يوسف: ابني أحرق وهو مصاب بسبب تحريض برنامجك على الإسلاميين

نشر الدكتور سيف عبدالفتاح، أستاذ العلوم السياسية عبر حسابه الشخصي على فيس بوك رسالة مؤلمة و ردت له من أم شهيد تعليقا على مقال باسم وسف الأخير بجريدة الشروق.
وقالت الأم في نص الرسالة : أنا السيدة نادية محمود بدران والدة الشهيد أحمد عبدالرحمن جلال؛ إبني يا أستاذ باسم كان مؤيدًا للشرعية ونزل يتظاهر ويدافع عن الأفكار والمبادئ اللي بيؤمن بيها؛ ابني كان معتصما في رابعة وأثناء وبعد فض الاعتصام بتصل عليه, موبايله علطول مقفول؛ فاكرة كويس لما نزلت حافية من البيت بعد ما سمعت عن إن الجثث في مسجد الإيمان ورحت ولم أجده هناك وقلت الحمد لله يبقى لسه عايش.
سمعت تاني يوم إن فيه جثث تانية في الشوارع الجانبية عند مشرحة زينهم؛ رحت أنا وبنتي ندور عليه ونكشف الكفن عن جثث كتير وبرضوا لم أجده هناك وحمدت ربنا تاني يبقى لسه عايش يااه يا أستاذ باسم لو كنت شفت اللي شفته عند المشرحة , هضربلك مثل تعرف يوم العيد الكبير لما كل واحد ياخد الأضحيه بتاعته ويروح للجزار علشان يدبحها وبعدين يستلمه!!
وتابعت الأم المكلومة : اهو المشهد عند المشرحة كان مماثل كل شخص ماسك جثة قريبه ومستني دوره في الدبح (قصدي في تقرير الوفاة)!! ؛ المهم كل شوية أروح هنا وابحث هنا عن أسامي المعتقلين وألف على الاقسام والسجون وفيه شباب كان بيتطوع ويساعدنا ربنا يكرمهم ويبارك فيهم! بس مع الأسف مر أكثر من شهر على الفض ومعرفش حاجة عن ابني ؛في يوم طلبوا مننا تحليل DNA علشان يمكن جثة لتكون جثة أحمد ابني تكون من الجثث المحروقة اللي محدش يعرفلها صاحب
عملنا التحليل والحمد لله بعد تعب وألم شهرين أستلمنا أول أمس جثة أحمد ,جثة محروقة مشوهة تماماً.
وأضافت أم الشهيد: "عارف يا أستاذ انا بحكيلك الكلام ده ليه؟ أنا عاوزاك تحط نفسك مكاني لو ابنك حصله نفس اللي حصل لابني بالظبط ,كنت هتعمل أيه؟!
ولو أنا اللي توجهي إسلامي وعملت برنامج يسخر ويحرض على كراهية الليبراليين أمثالك وبالفعل البرنامج لاقى نجاحا مبهرا بغض النظر هل أسلوب القص واللزق والتصيد للأخطاء أسلوب يتناسب مع الأخلاق المهنية أم لا..!!
المهم جزء من الشعب كره الجزء الأخر وابنك نزل يدافع عن ليبراليته واعتصم وبسبب البرنامج بتاعي الناس كرهت الجزء التاني من الشعب اللي منهم ابنك وحرضت على مواجهته بكل عنف!
واختتمت رسالتها لباسم يوسف بقولها تخيل "الشرطة والجيش دخلوا يفضوا الاعتصام ولاقوا ابنك مصاب في المستشفى الميداني وحرقوه وهو صاحي وفضلت شهرين تدور عليه وفاكر انه معتقل وفي الاخر تستلم حتة لحمة محروقة ويقولولك هو ده ابنك!!!
بالله عليك جاوبني كنت هتعمل فيا ايه؟!".