عصام سلطان لأبو الفتوح: اصحى يا نايم.. وتعالى رابعة العدوية لدعم البسطاء

وجه عصام سلطان، نائب رئيس حزب الوسط، رسالة إلى الدكتور عبد المنعم أبو الفتوح رئيس حزب مصر القوية طالبه فيها بالعودة إلى الوقوف في صف الشعب المصري البسيط، والتخلي عن خلافاته مع الإخوان.
وقال عبر موقع "فيس بوك": "أخي الدكتور أبو الفتوح.. بلاش الحنية الزيادة وأنت بتتكلم عن الخائن القاتل المنقلب، وتذكر القسوة والكره لدرجة العمى حين كنت تتكلم عن المنتخب".
وأضاف: "أخى الدكتور عبد المنعم.. صدمة الناس فيك كبيرة، هرولتَ إلى الطرطور بمجرد إشارة، وامتنعت عن المنتخب لمرارة فى نفسك لم تستطع التغلب عليها".
وتابع: "أخى الدكتور.. عمرك ما كنت أبدا بتاع لف ودوران، وكلام فى كلام، ومسك العصاية من النص، وتصفية حسابات شخصية بحتة، وسكوت على حق واضح، وطناش على باطل أوضح".
وأكمل: "أخى.. تعالى إلى رابعة العدوية، لدعم البسطاء الذين يدافعون عن أصواتهم فى أكثر من عشر جولات انتخابية خلال عامين.. بلاش حكاية الأصوات.. طب تعالى لدعمنا ضد الانقلاب زى ما دعمناك فى الانتخابات.. هى مش السياسة بردو خد وهات، مصالح يعنى.. والا أنت نظامك وان وى؟".
وأوضح قائلاً: "بصراحة أنا مشفق عليك، لا يحطك التاريخ جنب البرادعى وشفيق وبكرى وعكاشة وإلهام ودحلان وبهلوان.. خليك مع الغلابة تكسب.. وشيل الإخوان ومكتب الإرشاد والشاطر والارتكاريا من دماغك.. والله العظيم 80٪ من اللي هنا مش إخوان.. دا احنا معانا ليبراليين ويساريين وناصريين، مسلمين ومسيحيين، متدينين ومش متدينين، وفى ناس مابتصليش خالص وما بتصومش وهما أحرار، ومحدش له دعوة بحد، الاحترام المتبادل يسود الكل، وضد الانقلاب، وبس".
وقال :"اعتبرنى باتكلم بالنيابة عن أصحابك وأصدقائك وإخوانك وأحبابك اللى زعلانين منك أوى ومش راضيين يكلموك من كتر الزعل، واللى كانو واقفين معاك فى جولة الانتخابات الأولى، ضد الكل بمن فيهم مرسى، يعنى مش إخوان ولا حاجة".
واختتم تدوينته قائلاً: "يا رب نشوفك زى ما كنت زمان، واقف مع الحق من غير حسابات ولا توازنات.. انت بتفكر فى إيه..؟ هو انت وحمدين صباحى فاكرين إن السيسى هيعمل انتخابات رئاسية وهترشحوا نفسكوا مرة تانية؟ اصحى يا راجل يا طيب.. اصحى يا نايم.. وحد الدايم.